Тры гады хіміі за відэа ў “ВКонтакте” і знеслаўленне помніка

Падставай для абвінавачання паводле ч. 1 арт. 130 Крымінальнага кодэкса (наўмысныя дзеянні, скіраваныя на распальванне расавай варожасці) і ч. 2 арт. 346 (знеслаўленне помнікаў) сталі відэаматэрыялы, размешчаныя на асабістай старонцы віцябляніна ў сацыяльнай сетцы “ВКонтакте”.

На адным з асабістых фотаздымкаў, які быў зроблены сем гадоў таму, абвінавачаны ўскідвае руку ў нацыстскім вітанні на лесвіцы падземнага перахода да плошчы Перамогі ў Віцебску. Падчас суда ён тлумачыў, што не ўкладаў у гэты жэст ніякай абразы на адрас загінулых у час Вялікай Айчыннай вайны  і не імкнуўся зняславіць усталяваны ў гонар іх помнік.

Што да размешчаных у сацсетцы відэаролікаў, то абвінавачаны даводзіў суду: знайшоў іх у сеціве і “нават не паглядзеў”. Поводле яго слоў, увогуле ён быў перакананы, што ўся відэапрадукцыя, якую можна знайсці без абмежаванняў, не можа быць забароненай па прыкмеце экстрэмізму альбо расізму.

Падчас працэсу абвінавачаны не прызнаў віны і прасіў суд пакінуць яго на волі, бо ён страціць працу. Але суддзя Віцебскага абласнога суда Андрэй Прэйс 28 кастрычніка  вынес прысуд без уліку гэтай просьбы: адзін год абмежавання волі за знеслаўленне помніка абаронцам Айчыны і два з паловай гады за распальванне расавай варожасці. Агулам суд прызначыў пакаранне ў выглядзе абмежавання волі з накіраваньнем ва ўстанову адкрытага тыпу на тры гады і адзін месяц.

Асуджаны заявіў, што з такім рашэннем не згодны і будзе абскарджваць яго ў Вярхоўным судзе.