30 мільёнаў еўра для беларускіх праграмаў: Еўрасаюз падтрымае незалежныя медыя, рэпрэсаваных і грамадзянскую супольнасць

8 снежня Святлана Ціханоўская сустрэлася ў Бруселі з камісаркай Еўрапейскага Саюза па пытаннях пашырэння Мартай Кос. Камісарка паведаміла спадарыні Ціханоўскай пра пакет дапамогі ў 30 мільёнаў еўра, які будзе накіраваны на беларускія праграмы ў 2026 годзе. 

Святлана Ціханоўская ў Брусэлі. Фота: Telegram-канал Святланы Ціханоўскай

Беларуская лідарка падзякавала Марце Кос і Еўрапейскаму Саюзу за паслядоўную, прынцыповую пазіцыю і падтрымку рэпрэсаваных і незалежных журналістаў.

Нагадаем: дэмакратычныя сілы не ўдзельнічаюць у размеркаванні гэтай дапамогі. Гэта робіцца праз еўрапейскія праграмы падтрымкі і конкурсы для беларускіх і замежных НДА, якія працуюць па Беларусі. Дапамога будзе накіраваная перадусім на падтрымку рэпрэсаваных, незалежнай журналістыкі і грамадзянскай супольнасці.

Звычайна замежная дапамога, якая выдзяляецца на Беларусь, пакрывае наступныя напрамкі:

• падтрымка незалежных медыя і журналістаў (у тым ліку расследаванні, стварэнне кантэнту, ініцыятывы блогераў);
• праца аналітычных цэнтраў, экспертныя даследаванні;
• праваабарончая дзейнасць і маніторынг рэпрэсіяў (дакументаванне злачынстваў, ініцыятывы па прыцягненні да адказнасці);
• дапамога рэпрэсаваным і іх сем’ям (юрыдычная падтрымка, рэлакацыя, рэабілітацыя);
• ініцыятывы грамадзянскай супольнасці як унутры краіны, так і за мяжой;
• адукацыйныя праграмы (стыпендыі, даследаванні, абмены, трэнінгі, праграмы для моладзі, праграмы лідарства);
• культурніцкія праекты;
• лічбавая бяспека;
• падтрымка беларускай дыяспары і малога бізнесу беларусаў у выгнанні;
• падтрымка дэмакратычных інстытутаў і інш.

Як размяркоўваецца замежная дапамога? Адказ у гэтым відэа.