Праваабаронцы «Вясны» Алесь Бяляцкі, Уладзь Лабковіч, Валянцін Стэфановіч — на волі

Памілаванне адбылося пры садзейнічанні амерыканскага ўраду. Палітвязняў з месцаў няволі прымусова дэпартуюць за мяжу, паведамляе ПЦ «Вясна».

12 снежня ў Мінску пачаліся перамовы з амерыканскай дэлегацыяй на чале з Джонам Коўлам, якія цягнуліся два дні. Вынікам стала памілаванне 13 снежня 123 палітвязняў, якіх прымусова дэпартуюць за межы Беларусі.

Сярод памілаваных — кіраўнік і заснавальнік Праваабарончага цэнтру «Вясна», лаўрэат Нобелеўскай прэміі міру Алесь Бяляцкі, былы віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч, юрыст Уладзімір Лабковіч. Іх ўтрымлівалі за кратамі чатыры гады і пяць месяцаў.

Алесь Бяляцкі ў першыя хвіліны пасля дэпартацыі з Беларусі ў Літву. Фота: БАЖ

Нагадаем, 14 ліпеня 2021 года да Алеся Бяляцкага, Уладзіміра Лабковіча, Валянціна Стэфановіча і іншых вясноўцаў прыйшлі з ператрусамі. Праваабаронцаў абвінавацілі ў «кантрабандзе» і «фінансаванні групавых дзеяннях, якія груба парушаюць грамадскі парадак». У сакавіку 2023 года суддзя Марына Запаснік прысудзіла вясноўцам вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну. Пазней праваабаронцаў унеслі ў «спіс экстрэмістаў».

Да гэтага часу працягвае заставацца за кратамі каардынатарка Валанцёрскай службы «Вясны» Марфа Рабкова.