Беларускамоўная версія сайта LSM дажывае апошнія месяцы? Што вядома

На просьбу БАЖ захаваць беларускую версію партала адказала старшыня праўлення LSM.

Скрыншот з сайта LSM+

Старшыня праўлення Латвійскіх грамадскіх СМІ (LSM) Байба Зузена абяцае і надалей супрацоўнічаць з беларускімі журналістамі і нацыянальнай дыяспарай.

Перадгісторыя

Як мы пісалі раней, з 2023 года ў Латвіі паспяхова працуе беларускамоўная версія партала Латвійскіх публічных медыя (Latvi­jas Sabiedriskais medi­js, LSM). Але зусім нядаўна праўленне LSM агучыла стратэгічныя прыярытэты на 2026 – 2029 гады.

Стратэгічныя прыярытэты на 2026–2029 гады будуць дапрацоўвацца да канца гэтага года, а значыць вяшчанне ў цяперашнім выглядзе будзе існаваць толькі да канца года.

Прыярытэты прадугледжваюць новы падыход да стварэння кантэнта на замежных мовах. З наступнага года партал lsm.lv стане адзінай платформай навіновага кантэнта з магчымасцю выбіраць мову. У lsm.lv будзе інтэграваны і цяперашні кантэнт LSM+ і будзе выходзіць на англійскай, украінскай і рускай мовах і толькі ў лічбавым фармаце.

Беларуская асацыяцыя журналістаў накіравала кіраўніцтву LSM, а таксама старшыням Камісіі па правах чалавека і грамадскіх справах Сейма Латвіі і  Рады грамадскіх электронных СМІ зварот з просьбай паспрыяць захаванню беларускамоўнай версіі LSM.

Дэпутатка ад партыі «Прагрэсіўныя» ў Сейме Латвіі Лэйла Расіма лічыць, што нельга адмаўляцца ад беларускамоўнай версіі:

— Мы не павінны страціць гэты каштоўны рэсурс. Гэтаксама як і не павінны адмаўляцца ад кантэнту на беларускай мове ў лічбавым асяродку з меркаванняў эфектыўнасці працы і эканоміі сродкаў. Такім чынам мы не толькі эфектыўна ахопліваем беларускую дыяспару ў Латвіі, але і ўмацоўваем бяспеку Латвіі.

Такую пазіцыю займаюць і некаторыя іншыя латышскія палітыкі.

Беларуская меншасць з’яўляецца адной з буйнейшых ў найноўшай гісторыі Латвіі і складае каля 56 тысяч чалавек.

Байба Зузена: Мы працягнем цеснае супрацоўніцтва з аўтарамі, якія пішуць на мовах нацыянальных меншасцяў

Рэформа LSM мусіць пачацца са студзеня 2026 года. LSM.lv стане адзінай навіновай платформай на латышскай мове: з 2026 года ўвесь тэле- і радыёкантэнт будзе рабіцца на латышскай мове — дзяржаўнай.

Апошнія гады, апрача рускамоўнага кантэнта на LSM+ и радыёканале LR4, артыкулы і рэпартажы выдаваліся на беларускай, польскай і ўкраінскай мовах. Гэты матэрыялы, як адначае кіраўнічка LSM, рыхтаваліся пазаштатнымі журналістамі.

Калі казаць пра беларускую версію сайта, там працавалі два аўтары, чые працы публікаваліся на беларускай, рускай і латышскай мовах.

Спадарыня Байба Зузена спасылаецца на статыстыку выкарыстання LSM.lv і LSM+, якая паказвае, што на беларускамоўную версію заходзілі менш за 20 унікальных карыстальнікаў на дзень, а на польскамоўную — менш за 10. Для параўнання: украмоўны кантэнт прыцягвае каля 150 карыстальнікаў, у той час на латышскамоўны кантэнт дасягае амаль амаль 90 000 унікальных карыстальнікаў на дзень. 

Цяпер выпрацоўваецца новая канцэпцыя вяшчання на замежных мовах. Паводле яе, заместа рэдакцыйных блокаў на розных мовах, LSM прапануе адзіны кантэнт. І вяшчанне будзе весціся гна трох мовах: англійскай, рускай, украінскай.

«Наша місія — не толькі інфармаваць, але і садзейнічаць фармаванню згуртаванага і ўстойлівага грамадства, заснаванага на прынцыпах прыналежнасці да Латвіі. Гэта азначае ўмацаванне латышскай мовыі культуры, так і адлюстраванне разнастайнасці нашага грамадства, — піша Байба Зузена. — Мы імкнемся ствараць кантэнт, якому людзі давяраюць і які адлюстроўвае разнастайнасць латышскага грамадства. Для дасягнення гэтай мэты мы працягнем цеснае супрацоўніцтва з аўтарамі, якія пішуць на мовах нацыянальных меншасцяў, і арганізацыямі нацыянальных меншасцяў у Латвіі».

«LSM адкрыты для сумеснага дыялогу, таму LSM запрашае вас да размовы, каб абмеркаваць магчымасці будучага супрацоўніцтва і выслухаць ваша бачанне», — адзначыла Байба Зузена, звяртаючыся ў тым ліку да Асацыяцыі беларусаў Латвіі «Суполка».