Францыя забараніла некалькім беларускім журналістам працаваць на Алімпіядзе — СМІ
Улады Францыі забаранілі шэрагу расійскіх і беларускіх жрналістаў працаваць на Алімпійскіх гульнях, паведамляе выданне Le Journal du Dimanche.
![Беларускім журналістам забаранілі асвятляць Алімпіяду](https://baj.media/wp-content/uploads/2024/07/olimpiada_mok-jpg-webp.webp)
Фота: Міжнародны алімпійскі камітэт
Паводле слоў міністра ўнутраных спраў гэтай краіны Жэральда Дарманена, анкеты рэпарцёраў адхіленыя праз боязь шпіянажу і кібератак.
“Менш за сотню анкет мы адхілілі праз падазрэнні ў тым, што яны з’яўляюцца агентамі — шпіёнамі або інфарматарамі замежных дзяржаў, якія імкнуцца да ўмяшання ў гульні”, — цытуе Дарманена агенцтва “Спутник”.
Кіраўнік МУС падкрэсліў, што ў праве асвятляць Алімпіяду адмоўлена і карэспандэнтам “шэрагу іншых краін”, але не паведаміў, якіх менавіта.
Прозвішчы журналістаў ён не назваў, але ўдакладніў: такім чынам Парыж ужыў “прынцып засцярогі”, каб прадстаўнікі шэрагу замежных дзяржаў не змаглі атрымаць доступ да кампутарных сетак і здзейсніць кібератаку.
У чэрвені паведамлялася, што на Алімпіяду акрэдытаваныя журналісты чатырох беларускіх дзяржаўных медыя: інфармацыйнага агенцтва БелТА, газеты “Спартыўная панарама”, інтэрнэт-партала тэлеканала “Беларусь 5” і выдання “СБ. Беларусь сёння”. Таксама акрэдытацыю атрымалі выданне “Прессбол” (заснавальнік — Беларуская федэрацыя футбола) і прэс-служба Беларускай асацыяцыі гімнастыкі.
16 ліпеня стала вядома, што Белтэлерадыёкампанія, якая знаходзіцца пад санкцыямі, не будзе трансляваць афіцыйныя мерапрыемствы і спаборніцтвы Алімпійскіх гульняў.
У спаборніцтвах прыме ўдзел 17 беларускіх спартсменаў у нейтральным статусе.
Алімпійскія гульні пройдуць у Парыжы 26 ліпеня — 11 жніўня.
![](https://baj.media/wp-content/themes/baj/assets/images/telegram-logo.jpg)