«Бюро» спаўняецца 2 гады

Другі год існавання праекта стаў не менш дынамічным і плённым, чым першы. За год рэдакцыя правяла і апублікавала 13 эксклюзіўных вялікіх расследаванняў і некалькі дзясяткаў унікальных міні-расследаванняў і расследавальніцкіх навін. Акрамя таго, медыя эксперыментавала з фарматамі і цяпер выпускае расследаванні яшчэ і ў аўдыя.

У 2025 годзе «Бюро» стала членам GIJN. Медыя ўзяло ўдзел у маштабным праекце Dear Com­pa­tri­ots сумесна з 30 замежнымі расследавальніцкімі медыя. А восенню двое журналістаў рэдакцыі былі ўзнагароджаныя прэміяй «Вольнае слова» за свае расследаванні.

«Дзякуй, што вы з намі на гэтым шляху. Ваша вера ў нас матывуе і натхняе», — зазначае рэдакцыя.

Таксама медыяпраект прыводзіць у прыклад сваіх дасягненняў, такія падзеі:

• фігуранты расследавання «Вялікая наладка» падпалі пад санкцыі Брытаніі і ЕС, пасля гэтага яны былі вымушаныя пазбавіцца ад польскай кампаніі і змяніць пастаўшчыка аўтазапчастак для расійскага рынку;
• у Міністэрстве па падатках і зборах Беларусі зацікавіліся бухгалтэрыяй фонду Мікалая Карпянкова пасля выхаду нашага кастрычніцкага расследавання – гэта вынікае з адказу, які ведамства даслала «Бюро»;
• Літоўская мытня пачала праверку пасля нашага лістападаўскага расследавання пра пастаўкі абсталявання на беларускі завод у абыход санкцый.

У рэдакцыі падкрэсліваюць: яны і надалей будуць інфармаваць беларусаў пра выпадкі карупцыі і пра тых, хто падрывае дэмакратычныя прынцыпы, парушаючы законы і правы людзей.

«Сёння карупцыя застаецца адной з ключавых перашкодаў на шляху да справядлівасці і развіцця краіны. Раскрываючы новыя факты карупцыйных практык, мы не толькі перадаем грамадству важную інфармацыю, але і ствараем умовы для грамадскага абмеркавання і адкрытага дыялогу», — дадаюць журналісты.