Брэсцкія ўлады заклікаюць СМІ пісаць пра жыццё горада на падставе афіцыйных каментароў

Нагодай для такога звароту была публікацыя на адным з рэгіянальных інтэрнэт-рэсурсаў пра будоўлю ў гістарычным цэнтры Брэста на вуліцы Савецкай. Хаця ў паведамленні гарвыканкама не пазначана, пра якую менавіта публікацыю ідзе гаворка, можна меркаваць, што гэта тычыцца невялікай нататкі на сайце “Виртуальный Брест” пад назвай “Гостиница медленно превращается, медленно превращается… в апартаменты?”.

У публікацыі выказваецца меркаванне, што падчас рэканструкцыі будынкаў было зменена мэтавае прызначэння аб’екта і зараз — замест адміністратыўна-гасцінічнага комплекса — інвестар прапануе на продаж апартаменты (кватэры ў жылым комплексе). Аўтар нататкі падкрэслівае, што звычайным чынам змяніць прызначэнне аб’екта нельга: гэта мусіць быць узгоднена ў гарвыканкаме.  

“Дадзеная інфармацыя не адпавядае рэчаіснасці, а за каментаром у Брэсцкі гарвыканкам ніхто з прадстаўнікоў гэтага СМІ не звяртаўся”, — так адрэагавалі гарадскія ўлады. Чыноўнікі заяўляюць, што стасус будоўлі не быў зменены, а пасля прыняцця гарвыканкамам рашэння пра мэтавае прызначэнне аб’екта забудоўшчык абавязаны зарэгістраваць яго ў Брэсцкім агенцтве па дзяржаўнай рэгістрацыі і зямельным кадастры ў адпаведнасці менавіта з мэтавым прызначэннем.

Звяртае на сябе ўвагу апошні сказ у паведамленні ад імя гарадскіх уладаў, які тычыцца не толькі згаданай публікацыі. “Каб пазбегнуць апублікавання недакладнай інфармацыі, Брэсцкі гарадскі выканаўчы камітэт рэкамендуе прадстаўнікам СМІ ў пытаннях, якія тычацца жыццядзейнасці горада, звяртацца за каментарамі да службовых асоб Брэсцкага гарвыканкама і Брэсцкага гарадскога Савета дэпутатаў”.