КДБ атрымае неабмежаваны доступ да тэлефоннай базы абанентаў і ўсяго інтэрнэт-трафіка
Камітэт дзяржаўнай бяспекі Беларусі і Аператыўна-аналітычны цэнтр пры прэзідэнце зацвердзілі тэхнічныя патрабаванні “ў мэтах забеспячэння аператыўна-вышуковых мерапрыемстваў” для аператараў і пастаўшчыкоў паслуг электрасувязі, уладальнікаў інтэрнэт-рэсурсаў. Дакумент набудзе сілу 22 студзеня 2023 года і прадугледжвае тэхнічныя патрабаванні да баз дадзеных, аўтаматызаваных сістэм ды іншага абсталявання і праграмна-тэхнічных сродкаў.
Сумесная пастанова пад нумарам 1/1 з’явілася на нацыянальным інтэрнэт-партале, яе падпісалі кіраўнікі наглядных ведамстваў – Іван Церцель і Андрэй Паўлючэнка.
На дваццаці старонках тэксту пералічваюцца асноўныя навацыі, якія закрануць галіну дзеля “забеспячэння аператыўна-вышуковых мерапрыемстваў” у інтарэсах спецслужбаў.
У прыватнасці, ліцэнзаваныя пастаўшчыкі на патрабаванне адпаведных органаў мусяць беспярэчна забяспечыць доступ да базаў дадзеных і аўтаматызаваных сістэм аператараў электрасувязі, якія змяшчаюць інфармацыю пра абанентаў і карыстальнікаў інтэрнет-рэсурсаў, а таксама пра аказаныя паслугі і праграмна-тэхнічным сродкі, якія для гэтага выкарыстоўваліся.
Прапісваецца абавязковасць узаемадзеяння аператараў электрасувязі з “кампетэнтнымі органамі”, якія ажыццяўляюць аператыўна-вышуковую дзейнасць, упаўнаважанымі падраздзяленнямі Аператыўна-аналітычнага цэнтра пры прэзідэнце і Камітэта дзяржбяспекі, а таксама доступ гэтых падраздзяленняў да баз дадзеных і аўтаматызаваных сістэм пастаўшчыкоў паслуг электрасувязі, уладальнікаў інтэрнэт-рэсурсаў.
Акрамя таго, у патрабаваннях сілавікоў пералічаныя віды кантролю, якія павінны забяспечваць “сродкі аператыўны вышуковых мерапрыемстваў” на лініях тэлефоннай сувязі, а таксама вызначаныя звесткі, якія перадаюцца ў межах статыстычнага і поўнага кантролю.
Напрыклад, пры кантролі месцазнаходжання ў выдалены пункт павінны перадавацца дадзеныя аб базавай станцыі, якая абслугоўвае зададзенага карыстальніка мабільнай сувязі.
Пры гэтым у актыўным стане падаецца інфармацыя пра лакацыю абаненцкай прылады, а ў пасіўным — аб месцы знаходжання тэхнічнага прыставання ў межах працэдуры Location Update (не радзей чым раз у гадзіну пры ўмове ўключанай прылады).
Дакладна гэтак жа вызначаюцца патрабаванні да тэхнічных сродкаў і спосабаў перадачы дадзеных пры забеспячэнні доступу ў інтэрнэт. Пастановай таксама вызначаныя параметры запытаў інфармацыі з базаў дадзеных аператараў сувязі і патрабаванні да часу пошуку па іх.
Летась у верасні Аператыўна-аналітычны цэнтр выдаў пастанову, якой упарадкуецца працэдура блакавання непажаданых сайтаў. Калі раней пастаўшчыкі інтэрнэт-паслуг правяралі спіс абмежаванага доступу раз на суткі, то цяпер мусяць рабіць гэта кожныя тры гадзіны на працягу дня.
Дакументам, у прыватнасці, вызначана, што цяпер спіс абмежаванага доступу — туды ўносяцца ўсе інтэрнэт-рэсурсы, якія трапілі пад абмежаванні — могуць “фільтраваць” не толькі Міністэрства сувязі, Міністэрства інфармацыі, КДБ, МУС, КДК ды іншыя сілавікі, але і ўладальнікі навінавых агрэгатараў.
Іншымі словамі, згодна з пастановай, істотна скарачаецца час рэагавання на прызнаных кампетентнымі органамі рознага кшталту “экстрэмістаў”.
Так, пастаўшчыкі інтэрнэт-паслуг — правайдэры і мабільныя аператары — абавязаныя на працягу чатырох гадзін ад моманту ўключэння ў спіс «забароненых” абмежаваць доступ да канкрэтнага інтэрнэт-рэсурсу. Калі дагэтуль правяраць базу можна было раз на суткі, то цяпер неабходна гэта рабіць кожныя тры гадзіны.
Чытайце яшчэ:
Мінінфарм запускае працэс “узбуйнення рэгіянальных рэдакцый”. Што стаіць за эўфемізмам?
«Яны ўзбагачаюцца за чужы кошт»: мастакі падалі пазоў супраць стваральнікаў Midjourney і Stable Diffusion
Як выпісацца з кватэры, калі не можаш прыехаць у краіну, і ці трэба для гэтага перадаваць пашпарт?
![](https://baj.media/wp-content/themes/baj/assets/images/telegram-logo.jpg)