Фігурантаў справы аб забойстве нідэрландскага журналіста Пітэра дэ Врыса асудзілі на вялікія тэрміны

У Нідэрландах асудзілі шасцярых фігурантаў справы аб забойстве журналіста Пітэра дэ Врыса ў 2021 годзе. Іх прыгаварылі да тэрмінаў ад дзесяці да 28 гадоў пазбаўлення волі, паведамляе meduza.io са спасылкай на Dutch News і Deutsche Welle.

Пітэр дэ Врыс не толькі пісаў аб злачынным свеце, але і дапамагаў сведкам па справах вядомых злачынцаў. Фота: AFP

Непасрэдных выканаўцаў забойства суд прыгаварыў да 28 гадоў пазбаўлення волі, а арганізатара — да 26 гадоў. Яшчэ аднаму фігуранту, які даў злачынцам зброю, суд прызначыў 14 гадоў пазбаўлення волі.

Агулам у справе фігуравалі дзевяць чалавек. Двух саўдзельнікаў забойства суд прыгаварыў да дзесяці гадоў кожнага, яшчэ траіх па гэтай справе апраўдалі.

На Пітэра дэ Врыса — аднаго з самых вядомых крымінальных рэпарцёраў Нідэрландаў — напалі ўвечары 6 ліпеня 2021 года ў цэнтры Амстэрдама. У журналіста некалькі разоў стрэлілі з блізкай адлегласці, ён памёр праз дзевяць дзён. Следства лічыла, што дэ Врыса маглі забіць з‑за таго, што ён быў дарадцам ключавога сведкі па справе наркабарона Рыдуана Тагі (у лютым 2024 года таго прысудзілі да пажыццёвага зняволення).