Фрылансера Жукоўскага спрабуюць судзіць за чужы сюжэт

Жукоўскі ў чарговы раз абвінавачаны ў незаконным вырабе прадукцыі СМІ паводле часткі 2, артыкула 22.9 КаАП.

У пратаколе ўказана, што ён ў перыяд з 5 па 7 сакавіка на вуліцы Кніжнай праводзіў інтэрв’юраванне відэаблогера Паўла Главацкага, гамельчукоў Віталя Шулькіна і Альберта Апекуна, а пасля нібыта вырабіў відэасюжэт і размясціў яго ў праграме “Аб’ектыў” на польскім спадарожнікавым тэлеканале “Белсат”.

Аднак на прадастаўленым міліцыяй у суд дыску запісаны відэасюжэт, выраблены журналісткай Таццянай Уласенка. Згаданыя гамельчукі ў відэарадзе не фігуруюць, чуваць толькі іхнія галасы.

Жукоўскі заявіў у судзе, што не запісваў згаданых людзей менавіта на вуліцы Кніжнай. Таму патлумачыць недарэчнасць мусяць аўтары міліцэйскага пратакола. Наступнае слуханне справы прызначанае на 2 траўня.

Жукоўскі патлумачыў, што не зможа ў гэты дзень прыйсці ў суд, паколькі праходзіць медычную камісію ў звязку з прызывам на ваенныя зборы.

“Гэта хутчэй за ўсё палітычны прызыў. Штрафы не дапамагаюць, дык вырашылі прызваць на зборы, каб хоць на два месяцы адлучыць мяне ад журналісцкай дзейнасці”, — выказаў сваё меркаванне ў гутарцы з карэспандэнтам службы маніторынгу ГА “БАЖ” фрылансер Жукоўскі.

Журналіст паведаміў таксама, што 23 красавіка суддзя Цэнтральнага раёна Гомеля Сяргей Кармановіч завочна аштрафаваў яго на 30 базавых велічыняў: за незаконны пікет і стрым у Face­book інцыдэнту ў доме грамадскага актывіста Барыса Анікеева.

Пікет Жукоўскі праводзіў яшчэ 30 студзеня, будучы кандыдатам у дэпутаты гарсавета, а стрым рабіў 16 сакавіка на просьбу Анікеева. Тады міліцыянты прыйшлі ў дом грамадскага актывіста, каб  затрымліваць  яго “за абразу прэзідэнта”. Праваахоўнікі замкнулі знутры дзверы на ключ, нічога не патлумачылі і сталі чакаць падмогу, каб забраць актывіста ў пастарунак.

Стрыміў інцыдэнт Жукоўскі на сваю старонку ў Face­book. Частку відэаздымкаў скарыстаў спадарожнікавы тэлеканал “Белсат”. Суд расцаніў гэта як незаконны выраб прадукцыі СМІ для замежнага тэлеканала без акрэдытацыі.