Гісторык Ігар Кузняцоў выступіў з лекцыяй у “Медыяпрасторы” і падтрымаў грамадскую кампанію “Забітыя і забытыя”

“Дзякуй усім за тое, што  ініцыятыва ўвекавечання памяці ахвяраў масавых рэпрэсій узнікла на рэгіянальным узроўні. Падобныя  ініцыятывы запачаткаваныя ў Віцебску:  “Хайсы — “Віцебскія Курапаты”, у Оршы: “Кабылякі” —  Расстраляны ў Воршы”. Асобныя даследчыкі  заняліся гісторыяй рэпрэсій у Гродне, Магілёве, Мінску”, — зазначыў Ігар Кузняцоў.

Паводле гісторыка, нягледзячы на мноства ахвяр не толькі палітычных, але і адміністрацыйных ды іншых неапраўданых рэпрэсій, гэтая тэма ў Беларусі не вывучаецца. Ні КДБ, ні МУС не даюць звестак пра месцы масавых расстрэлаў мірных грамадзян, недаступнымі застаюцца архівы з інфармацыяй пра рэпрасаваных. Некаторыя падлікі дазваляюць сцвярджаць, што ў Беларусі ў жорны рэпрэсій патрапілі  каля паўтара мільёна жыхароў. Сотні тысяч былі высланыя ў турэмныя лагеры ў Сібір ды іншыя рэгіёны былога СССР, расстраляна  371 тысяча чалавек, у тым ліку 41 тысяча — на Гомельшчыне.

Масавыя пахаванні выяўленыя падчас раскопак у 90‑х гадах у Шчакатоўскім лесе па правы бок шашы Гомель – Чарнігаў. Па левы бок, у  Бутулінскім лесе, другое вядомае месца  масавых расстрэлаў мірных жыхароў.  Тут у 2007 годзе салдаты 52-га спецыялізаванага пошукавага батальёна Міністэрства абароны паднялі на паверхню з розных магіл косткі і прастрэленыя чарапы 70 ахвяраў. 

Грамадская кампанія “Забітыя і забытыя”, якая стартавала ў Гомелі напрыканцы 2019 года, ставіць на мэце належным чынам даследаваць трагічныя старонкі беларускай гісторыі, запісаць сведчанні людзей, сабраць архіўныя звесткі, усталяваць памятныя знакі ў месцах масавых расстрэлаў бязвінных ахвяр  камуністычнай дыктатуры. У падтрымку ініцыятывы, як патлумачыла каардынатар кампаніі, сябра ГА “БАЖ” Ларыса Шчыракова, сабрана ўжо звыш за 600 подпісаў жыхароў абласнога цэнтра.