Google запусціла «забойцу Photoshop» — ШІ-рэдактар Nano Banana

Кампанія абвясціла аб запуску новай мадэлі Gem­i­ni 2.5 Flash Image, таксама вядомай пад унутраным кодавым імем Nano Banana. Яна ўбудавана ў праграму Gem­i­ni і ўжо даступная як карыстальнікам, так і распрацоўшчыкам праз платформы Gem­i­ni API, Google AI Stu­dio і Ver­tex AI.

Мадэль прызначана для высокадакладнага рэдагавання выяў з дапамогай простых тэкставых запытаў. У адрозненне ад многіх іншых ШІ-рэдактараў, Gem­i­ni 2.5 Flash Image значна лепш захоўвае твары, прадметы і дэталі без скажэнняў, дазваляючы паэтапна змяняць фотаздымкі, камбінаваць некалькі здымкаў і прымяняць стылі.

Водгукі першых карыстальнікаў пацвярджаюць паляпшэнні. Так, удзельнік тэставання пад нікам @D_studioproject напісаў, што мадэль здольная ператвараць адну выяву ў цэлую кінематаграфічную паслядоўнасць: «Узгодненасць паміж сцэнамі бездакорная, працэс у 10 разоў хутчэйшы». Іншыя карыстальнікі ў сацсетках адзначаюць, што інструмент дазваляе прымяраць адзенне на фотаздымках з высокай дакладнасцю і натуральнасцю.

Для прадухілення злоўжыванняў Google укараніла ахоўныя меры: усе выявы, створаныя з дапамогай Gem­i­ni 2.5 Flash Image, атрымліваюць бачны вадзяны знак і нябачную лічбавую метку Syn­thID, якую можна выявіць нават пасля рэдагавання. Мадэль ужо заняла лідзіруючыя пазіцыі ў рэйтынгу платформы LMAre­na, дзе ацэньваюцца генератыўныя ШІ. Эксперты адзначаюць, што новае рашэнне Google здольна скласці сур’ёзную канкурэнцыю інструментам Ope­nAI і xAI у сегменце апрацоўкі выяў.

Як выявы, створаныя штучным інтэлектам, змяняюць фотажурналістыку і ўсё нашае жыццё