Грошы на хостынг для інтэрнэт-часопіса «Таўбін» сабралі за выходныя

Сайт  інтэрнэт-часопіса сучаснай беларускай паэзіі «Таўбін» будзе працаваць яшчэ як мінімум два гады, паведаміла каманда праекта. Гэта адбылося дзякуючы чытачам выдання, якія дапамаглі сабраць грошы на аплату дамену і хостынгу.

Інтэрнэт-часопіс «Таўбін» публікуе беларускую паэзію, пераклады паэзіі з замежных моваў, інтэрв’ю з літаратарскай і актывісцкай супольнасцю, літаратурна-крытычныя артыкулы. 6 лютага рэдакцыя апублікавала аб’яву з просьбай пра дапамогу. Да гэтага 4 гады каманда развівала праект за ўласныя сродкі, без заробкаў і ганарараў.

«Больш за чатыры гады мы ствараем архіў сучаснай беларускай паэзіі, публікуем пераклады вершаў з многіх моў свету, водгукі і рэцэнзіі на свежыя кнігі, робім інтэрв’ю з аўтарамі і аўтаркамі і пашыраем веды пра беларускую літаратуру — усё дзеля таго, каб наша культура, наша паэзія знаходзіла сваіх прыхільнікаў і прыхільніц у любой кропцы свету і была дасяжная кожную хвіліну. Шмат таго, што ёсць у нашым часопісе, няма больш нідзе — прынамсі, у свабодным доступе, — і таму вельмі важна, каб TAUBIN быў», — напісалі стваральнікі журнала.

Беларусы актыўна падтрымалі выданне, і ўжо цягам выходных удалося сабраць патрэбную суму. Каманда падзякавала ўсім, хто дапамагаў «сродкамі, словамі, распаўсюдам інфармацыі» і распавяла, што сайт «Таўбін» дзякуючы збору будзе дзейнічаць як мінімум два гады.

На дадзены момант каманда не мае тэрміновай патрэбы ў сродках, але збор не закрыты і можна пры жаданні падтрымаць праект ПА СПАСЫЛЦЫ.