У «экстрэмісцкі» спіс Мінінфарма ўключылі больш за 20 акаўнтаў СМІ і блогераў у Тhreads

Увечары 28 студзеня Міністэрства інфармацыі Беларусі ў чарговы раз папоўніла  Рэспубліканскі спіс экстрэмісцкіх матэрыялаў на сваім сайце. Выглядае, што ў органах пракуратуры, якія складаюць заявы ў суды, пошук «экстрэмізму» ў сацсетцы Тhreads стаў новым трэндам.

Фота: David Rado для Pexels.com

Паводле рашэння суда Партызанскага раёна Мінска ад 26 студзеня 2026 года ў Рэспубліканскі спіс экстрэмісцкіх матэрыялаў трапілі адразу 27 акаўнтаў у сацыяльнай сетцы Тhreads. Сярод іх два дзясяткі акаўнтаў, што належаць беларускім незалежным медыя і блогерам:

• «Вот Так» (ідэнтыфікатар threads.com/@vottaktv);
• REFORM.news (ідэнтыфікатар threads.com/@reform.news);
• «Новы Час | Novy Čas» (ідэнтыфікатар threads.com/@novychas);
• NEXTA | НЕХТА (ідэнтыфікатар threads.com/@nexta_tv);
• «Беларусь Новости» (ідэнтыфікатар threads.com/@belarusnovosti2);
• «БРЦ / Беларускi расследавальнiцкi цэнтр» (ідэнтыфікатар threads.com/@belarus_file);
• «БЮРО – раследаваннi пра Беларусь» (ідэнтыфікатар threads.com/@buromedia_by);
• «Наша Нiва | Nashaniva.com» (ідэнтыфікатар threads.com/@nashaniva);
• MOST | ПОЛЬША | БЕЛАРУСЬ (ідэнтыфікатар threads.com/@mostmedia.io);
• Media IQ (ідэнтыфікатар threads.com/@mediaiq_official);
• «Медиапроект Маланка» (ідэнтыфікатар threads.com/@malanka_media);
• «Чай з малинавым варэннем» (ідэнтыфікатар threads.com/@godofbelarus);
• «Салiдарнасць» (ідэнтыфікатар threads.com/@gazetabycom);
• «Зелёный портал» (ідэнтыфікатар threads.com/@greenbelarus);
• CityDog.io – журнал о беларусах (ідэнтыфікатар threads.com/@citydog_by);
• «ЧестнОК | ЧаснОК» (ідэнтыфікатар threads.com/@chestnokby);
• «Будзьма беларусамi!» (ідэнтыфікатар threads.com/@budzma);
• «Беларусь Новости» (ідэнтыфікатар threads.com/@belarusnovosti);
• старонка блогера Сяргея Бяспалава Sergey Bespalov (ідэнтыфікатар threads.com/@artasok);
• «Радыё Свабода» | Беларусь» (ідэнтыфікатар threads.com/@radiosvaboda).

Што тычыцца апошняга інтэрнэт-рэсурсу, то яго ўключылі ў «экстрэмісцкі» спіс Міністэрства інфармацыі ўжо другі раз. На тры дні раней яго прызнаў «экстрэмісцкай інфармацыйнай прадукцыяй» суд Жлобінскага раёна Гомельскай вобласці.

Да слова, у пералік рэсурсаў, згаданых у рашэнні суда Партызанскага раёна ад 26 студзеня, ёсць і два акаўнты ў Тhreads вызваленых у канцы мінулага года палітыкаў — Марыі Калеснікавай і Віктара Бабарыкі.  

27 студзеня 2026 года суд Жлобінскага раёна Гомельскай вобласці пастанавіў лічыць «экстрэмісцкай інфармацыйнай прадукцыяй» акаўнты «МАЯ КРАIНА БЕЛАРУСЬ» (ідэнтыфікатар threads.com/@majakrainabelarus) і «Дзе Навiны?» (ідэнтыфікатар threads.com/@dzenews). З апошнім інтэрнэт-рэсурсам зноў атрымаўся «дубляж»: першым «экстрэмізм» засведчыў суд Буда-Кашалёўскага раёна Гомельскай вобласці ў сваім рашэнні ад 19 студзеня 2026 года.

Дадатковае рашэнне па прызнанні «экстрэмісцкай інфармацыйнай прадукцыяй» вынес 23 студзеня 2026 года суд Пінскага раёна і горада Пінска Брэсцкай вобласці. Наўздагон у спіс экстрэмісцкіх матэрыялаў уключылі лагатып інтэрнэт-рэсурса «Про Инфо» — надпіс «proin­fo. Информационные материалы», выкананы рознымі колерамі. Сам акаўнт «Про Инфо» ў сацыяльнай сетцы «ВКонтакте» з гэтым лагатыпам пінскі суд прызнаў «экстрэмісцкім» сёлета 5 студзеня. Гэта старонка пра навіны Лунінецкага раёна, якая мае ўсяго 5 падпісчыкаў і не абнаўлялася з лютага 2024 года.