«Экстрэмісцкі» спіс Мініфарама: навінавая старонка «Ганцавічы» ў «ВКонтакте» і відэаролік на YouTube-канале «Котрикадзе иностранных дел»

Міністэрства інфармацыі Беларусі чарговы раз папоўніла Рэспубліканскі спіс экстрэмісцкіх матэрыялаў на сваім сайце.

Кацярына Катрыкадзэ. Фота: tribuna.ee

Паводле рашэння суда Ленінскага раёна Магілёва ад 24 лістапада 2025 года ў гэты спіс уключылі відэаролік з назвай «Лукашенко торгуется с Трампом. Что задумал диктатор и зачем он нужен США».

Відэа размешчанае на YouTube-канале «Котрикадзе иностранных дел» (ідэнтыфікатар youtube.com/@kotrikadze). Кацярына Катрыкадзэ —кіраўніца інфармацыйнай службы і вядоўца тэлеканала «Дождь», які пасля нападу Расіі на Украіну быў уключаны ў расійскі Рэестр інаагентаў і працуе ў вымушанай эміграцыі. На сваім YouTube-канале журналістка асвятляе падзеі сусветнай палітыкі.

Рашэннем суда Ганцавіцкага раёна Брэсцкай вобласці ад 26 лістапада 2025 года «экстрэмісцкай інфармацыйнай прадукцыяй» прызнаны акаўнт  «Ганцавічы» ў сацыяльнай сетцы «ВКонтакте» (ідэнтыфікатар vk.com/gancchas). Інтэрнэт-рэсурс асвятляе мясцовыя навіны са спасылкамі на розныя сродкі масавай інфармацыі.