«Экстрэмісцкі» спіс Мінінфарма: сацсеткі блогера Максіма Каца, Instagram-акаўнты «Беларускага мартыралога» і «Чын Чын Чэнэла»

Міністэрства інфармацыі Беларусі 8 жніўня зноў папоўніла Рэспубліканскі спіс экстрэмісцкіх матэрыялаў.

Максім Кац/ Фота: SOTAvi­sion

Паводле рашэння суда Пружанскага раёна Брэсцкай вобласці ад 4 жніўня 2025 года ў гэты спіс трапілі інтэрнэт-рэсурсы расійскага блогера Максіма Каца. «Экстрэмісцкай інфармацыйнай прадукцыяй» суд прызнаў:

• YouTube-канал «Максим Кац» (ідэнтыфікатар youtube.com/@Max_Katz);
• Telegram-канал «Максим Кац» (ідэнтыфікатар t.me/maximkatz);
• старонку «maxim_katz» у Insta­gram (ідэнтыфікатар  instagram.com/maxim_katz);
• старонку «Максим Кац» у сацсетцы Х (ідэнтыфікатар x.com/max_katz);
• старонку «Максим Кац» у Face­book (ідэнтыфікатар facebook.com/katz.max).

У адпаведнасці з рашэннем суда Савецкага раёна Мінска ад 5 жніўня 2025 года «экстрэмісцкім» прызнаны Insta­gram-акаўнт сатырычнага праекта «Чын Чын Чэнэл» (ідэнтыфікатар instagram.com/chinchinchannelofficial). Гэты інтэрнэт-рэсурс, які мае больш за 9 тысяч падпісчыкаў, уключаны ў Рэспубліканскі спіс экстрэмісцкіх матэрыялаў другі раз цягам месяца. Першы раз гэта адбылося 25 ліпеня 2025 года па рашэнні суда Ленінскага раёна Магілёва.

Рашэннем суда Савецкага раёна Мінска ад 5 жніўня 2025 года «экстрэмісцкім» прызнаны Insta­gram-акаўнт «belaru­sian­mar­ty­rol­o­gy» (ідэнтыфікатар instagram.com/belarusianmartyrology). Старонка праекта «Беларускага мартыралога» прысвечаная гісторыям беларускіх палітзняволеных, у тым ліку журналістаў-палітвязняў.