У «экстрэмісцкі» спіс Мініфарма трапілі сацсеткі незалежных медый

Увечары 15 снежня Міністэрства інфармацыі Беларусі чарговы раз папоўніла на сваім сайце Рэспубліканскі спіс экстрэмісцкіх матэрыялаў.

Выява зроблена БАЖ пры дапамозе Chat­G­PT

Паводле рашэння суда Ленінскага раёна Брэста ад 12 снежня 2025 года «экстрэмісцкай інфармацыйнай прадукцыяй» прызнаная суполка ў сацыяльнай сетцы «ВКонтакте» з назвай «Бинокль. Журнал о Бресте» (ідэнтыфікатар vk.com/binklby).

Выданне «Бинокль» з’явілася ў Брэсце ў 2016 годзе, Анлайн-часопіс пісаў пра гарадскія грамадскія ініцыятывы і мясцовыя цікавосткі. У студзені 2021 года сілавікі прыйшлі з ператрусам у рэдакцыю, забралі дакументы і камп’ютары. Ператрус праводзіўся нібыта ў межах справы пра нясплату падаткаў. Яшчэ праз некалькі месяцаў сілавік правялі ператрусы ў кватэрых супрацоўнікаў рэдакцыі. З тае пары праца гарадскога часопіса спынілася, кантэнт сацсетак выдання таксама не абнаўляўся.

У адпаведнасці з рашэннем суда Салігорскага раёна Мінскай вобласці ад 10 снежня 2025 года «экстрэмісцкім» прызнаны кантэнт YouTube-канала «Зеркало» (ідэнтыфікатар youtube.com/@ZERKALOIO). Іншыя старонкі выдання «Зеркало» ў сацсетках і сайт гэтага медыярэсурсу былі прызнаныя «экстрэмісцкай інфармацыйнай прадукцыяй» раней. У чэрвені 2023 года «Зеркало» абвясцілі ў Беларусі «экстрэмісцкім фармаваннем», у адпаведным рашэнні Міністэрства ўнутраных спраў згадваліся сайт медыя, сацыяльныя сеткі і ягоны лагатып.

Рашэннем суда Мазырскага раёна Гомельскай вобласці ад 8 снежня 2025 года «экстрэмісцкай інфармацыйнай прадукцыяй» прызнаны YouTube-канал з назвай «ИНФОVESTI» (ідэнтыфікатар youtube.com/@vesti3921). «Усе свежыя навіны Украіны, Казахстана, Расіі і свету» , — так прэзентуе сябе гэты інфармацыйны рэсурс, які мае 145 тысяч падпісчыкаў. 

Суд Мазырскага раёна Гомельскай вобласці сваім рашэннем ад 8 снежня 2025 года прызнаў «экстрэмісцкай» суполку «Радыё Свабода» ў сацсетцы «Одноклассники». Так напісана ў дакуменце на сайце Мінінфарма. Але там пададзеныя звесткі ўсяго пра адзін відэаролік з лагатыпам «Радыё Свабода», размешчаны на прыватнай старонцы ў «Одноклассниках» (ідэнтыфікатар ok.ru/video/1850477578904). На гэтым відэароліку дэманструюцца сцэны збіцця сілавікамі затрыманых пратэстоўцаў у ноч пасля прэзідэнцкіх выбараў 2020 года.