У Беларусі «экстрэмісцкай» прызналі Instagram-старонку польскага прафесійнага фатографа

Інфармацыя пра гэта з’явілася ўвечары 9 ліпеня ў Рэспубліканскім спісе экстрэмісцкіх матэрыялаў, які складае на сваім сайце Міністэрства інфармацыі Беларусі.

Рашэнне аб прызнанні Insta­gram-акаўнта «michalkosc»  (ідэнтыфікатар instagram.com/p/DDDZ8sIoi5n/?img_index=1) прыняў 8 ліпеня суд Пухавіцкага раёна Мінскай вобласці.

Найверагодней, прычынай стала наяўнасць на старонцы Міхала Косця ягоных здымкаў з беларускіх акцый салідарнасці ў Польшчы, з польска-беларускага памежжа, выяваў вядомых асоб, у тым ліку палітзняволенага заснавальніка праваабарончага цэнтра «Вясна» Алеся Бяляцкага.

Міхал Косць (Michał Kość) жыве ў Беластоку, ён сябра Асацыяцыі польскіх мастацкіх фатографаў, фатограф Польскага агенцтва фатографаў FORUM.