Камітэт дзяржкантролю адрэагаваў на відэасюжэт журналіста-фрылансера

“На пачатку траўня ў вёсцы Барсукі мы наткнуліся на парэшткі цялят і кароў на мясцовай ферме. Яны валяліся проста за кармацэхам. Спрабавалі высветліць, што адбылося, але зрабіць гэта аказалася няпроста. Разыграўся вясковы дэтэктыў з пераследам, пагрозамі, фізічным гвалтам”, – распавёў  службе маніторынгу ГА “БАЖ” Кастусь Жукоўскі.

Мясцовыя жыхары на ўмовах ананімнасці распавялі журналістам, што жывёла ў саўгасе прападала ад бяскорміцы. Зроблены відэасюжэт “На Гомельшчыне цяляткі дохнуць ад голаду” Жукоўскі накіраваў і ў рэгіянальны Камітэт дзяржкантролю.

На днях  журналіст-фрылансер атрымаў ліст з гэтай дзяржаўнай установы, у якім, у прыватнасці, гаворыцца:

“Па інфармацыі, якая прадастаўлена камітэтам па сельскай гаспадарцы і харчаванні Гомельскага аблвыканкама, факт несанкцыянаванага пахавання трупаў жывёлы ў “КСУП імя Валадарскага” ў вёсцы Барсукі Кармянскага раёна пацвердзіўся. У дачыненні кіраўніцтва распачаты адміністрацыйны працэс”.

Кастусь Жукоўскі дадае: “Калі б улады заўсёды прынцыпова ставіліся да праблем, якія ўзнімаюць незалежныя журналісты, а не толькі думалі, як аштрафаваць іх за незаконны выраб прадукцыі СМІ, парадку ў краіне было б нашмат больш”.