Прэмія Voices Awards 2026 для журналістаў у краінах ЕС (дэдлайн — 12 студзеня)

Міжнародны конкурс Voic­es Awards 2026 узнагароджвае тых, хто змяняе сітуацыю ў галіне журналістыкі і свабоды СМІ. Прэмія з’яўляецца часткай Voic­es – Euro­pean Fes­ti­val of Jour­nal­ism and Media Free­dom — фестывалю журналістыкі і свабоды СМІ ў ЕС.

Прэмія Voic­es Awards 2026 мае на мэце адзначыць разнастайнасць сучаснай еўрапейскай журналістыкі і міжнародныя перадавыя практыкі, якія спрыяюць свабодзе слова.

Вітаюцца работы і ініцыятывы, якія:

• вырашаюць актуальныя грамадскія праблемы;
• выкрываюць карупцыю і парушэнні правоў;
• спрыяюць большай празрыстасці і падсправаздачнасці ўладаў;
• узмацняюць ролю медыя ў грамадстве;
• развіваюць медыяпісьменнасць і ўдзел грамадзян у інфармацыйнай прасторы.

Хто можа падаць заяўку

Арганізатары вітаюць заяўкі ад шырокага кола прэтэндэнтаў, у тым ліку:

• сродкаў масавай інфармацыі (вэб-сайты, блогі, падкасты і г. д.),
• журналістаў-фрылансераў,
• студэнтаў факультэтаў журналістыкі і стажораў-журналістаў,
• асобаў або груп, якія актыўна займаюцца дзейнасцю па павышэнні медыяпісьменнасці.

Усе ўдзельнікі павінны легальна пражываць у краінах ЕЗ ці краінах-кандыдатах.

Катэгорыі прэміі Voices Awards 2026

Прэмія разлічана на 7 асноўных катэгорый:

• прэса, радыё і падкасты,
• відэа і дакументальны фільм,
• лічбавае апавяданне і сацыяльныя сеткі,
• мультфільмы і коміксы,
• фотажурналістыка,
• медыяпісьменнасць,
• прэмія Ларэнца Наталі за лепшыя міжнародныя практыкі ў журналістыцы.

У кожнай з першых шасці катэгорый будуць прысуджаны па чатыры ўзнагароды, а ў апошняй — адна.

Пераможцы ў кожнай з катэгорый атрымаюць грашовы прыз 1200 еўра. Цырымонія ўзнагароджання адбудзецца на фестывалі Voic­es у Фларэнцыі (Італія) 10–12 сакавіка 2026 года.

Умовы ўдзелу

• Праекты павінны быць апублікаваныя ў апошнія 12 месяцаў.
• Падача — толькі на адну катэгорыю.
• Матэрыялы павінны быць перакладзены на англійскую мову.
• Члены журы і папярэднія лаўрэаты не могуць падавацца ў той жа год.

Апошні тэрмін падачы заявак — 12 студзеня 2026 года.

ПАДРАБЯЗНАСЦІ І РЭГІСТРАЦЫЯ