Рэжым блакіроўкі не дазволіў ФБР атрымаць доступ да iPhone журналісткі

ФБР не змагло атрымаць дадзеныя з iPhone 13 журналісткі The Wash­ing­ton Post Ханы Натансан, паколькі на прыладзе быў уключаны рэжым Lock­down Mode. «КіберБабёр» распавёў, што гэта такое і як уключыць гэты рэжым.

Выява зроблена БАЖ з дапамогай Chat­G­PT

Што адбылося?

Падчас вобшуку ў журналісткі Ханы Натансан спецгрупа канфіскавала iPhone 13 і іншыя прылады. Але калі эксперты лічбавай крыміналістыкі паспрабавалі атрымаць дадзеныя з тэлефона, іх прылады не змаглі падлучыцца да гаджэта і выпампаваць інфармацыю, бо Lock­down Mode блакаваў усе шляхі доступу.

Што такое Lockdown Mode (рэжым блакавання)?

Гэта апцыянальны рэжым абароны Apple, прызначаны для людзей, якія могуць падвяргацца высокатэхналагічным нападам з боку вузкаспецыялізаванага шкоднаснага ПА ці дзяржспансаваных хакераў (напрыклад, шпіёнскімі праграмамі накшталт Pega­sus).

Калі ён уключаны:

• Блакуецца большасць укладанняў і складаныя функцыі ў паведамленнях.
• Абмяжоўваюцца тэхналогіі браўзэра для зніжэння «паверхні нападу».
• Face­Time прымае выклікі толькі ад кантактаў з адраснай кнігі.
• Без разблакоўкі прылады немагчымыя падлучэнні да аксэсуараў і кампутараў.

Lock­down Mode не патрэбны большасці карыстальнікаў, але для людзей з высокай рызыкай узлому гэта будзе карысна.

Як уключыць:

🔺Адкрыйце «Налады» → «Канфідэнцыяльнасць і бяспека» → «Рэжым блакавання»;
🔺Націсніце кнопку «Уключыць рэжым блакавання» і пасля азнаямлення з апісаннем рэжыму пацвердзіце дзеянне яшчэ раз.
🔺Абярыце «Уключыць і перагрузіць», а потым увядзіце код-пароль ад прылады.

Звярніце ўвагу, актываваны рэжым блакіроўкі мяняе працу некаторых прыкладанняў і функцый прылады, а некаторыя магчымасці iPhone і зусім могуць быць недаступныя.

Атрымаць бясплатную кансультацыю ад «КіберБабра» можна тут.