Школа журналістыкі IFAE распачынае новы набор (дэдлайн — 1 красавіка)

Школа журналістыкі IFAE Medi­aL­ab аб’яўляе набор на новы сезон. Да ўдзелу ў Школе запрашаюцца беларусы з Польшчы і Літвы, якія маюць невялікі досвед журналісцкай працы альбо толькі плануюць паспрабаваць сябе ў журналістыцы. 

З чаго складаецца Школа?

• Кароткатэрміновы (4 дні) экспрэс-курс па асновах журналістыкі (18–21 красавіка), які закладзе табе “базу”. Вядоўцамі курса будуць дасведчаныя журналісты і рэдактары, якія штодня працуюць з тэкстамі, відэа, інфаграфікай і г.д. Ты навучышся шукаць інфармацыю, пісаць навіны і эксплэйнеры, браць інтэрв’ю, ствараць інфаграфіку, карыстацца інструментамі штучнага інтэлекту. Усё гэта – у жывым афлайн фармаце, у прыгожым месцы і ў добразычлівай атмасферы!
• Стажыроўка (анлайн) у рэдакцыях беларускіх медыяў (красавік-травень). Ты з галавой акунешся ў працу рэдакцыі, зможаш рыхтаваць свае матэрыялы з дапамогай рэдактароў-ментараў. Магчыма, тут ты атрымаеш сваю першую прапанову супрацы!
• Дадатковыя анлайн заняткі, якія паглыбяць твае веды ў розных аспектах журналістыкі (травень). Тэматыку заняткаў будзеце вызначаць вы самі! Заняткі правядуць вядомыя беларускія журналісты і журналісткі – прафесіяналы сваёй справы.
• Конкурс лепшых публікацый (чэрвень) з грашовымі ўзнагародамі для лепшых аўтараў і аўтарак публікацый, падрыхтаваных за час практыкі.

Удзельнікі, якія пройдуць увесь цыкл навучання, атрымаюць сертыфікаты пра сканчэнне Школы журналістыкі.

Самыя актыўныя выпускнікі і выпускніцы Школы будуць таксама запрошаныя ў чэрвені 2026 года на IFAE Medi­a­Jam – сустрэчу выпускнікоў нашых праграм, прысвечаную развіццю карысных медыякампетэнцый і наладжванню карысных сувязяў!

Каго запрашаюць

Да ўдзелу ў Школе запрашаюцца беларусы з Польшчы і Літвы, якія маюць невялікі досвед журналісцкай працы альбо толькі плануюць паспрабаваць сябе ў журналістыцы. Вітаюцца таксама заяўкі ад людзей, якія плануюць развіваць уласныя медыяпраекты (блогі, ютуб-каналы, падкасты і г.д.).

Магчымы ўдзел людзей і з іншых краін у выпадку гатоўнасці самастойна кампенсаваць свой праезд (арганізатары кампенсуюць дарожныя выдаткі ў памеры да 55 долараў).

Як заявіцца?

Заяўкі на ўдзел прымаюцца да 1 красавіка 2026 года.

Пасля гэтага адабраным удзельнікам і ўдзельніцам будзе прапанавана падцвердзіць свой удзел у Школе.

Прыярытэтам пры адборы будуць карыстацца асобы, якія якасна апішуць сваю матывацыю і падрабязна адкажуць на іншыя пытанні ў форме заяўкі.