Кіраўніцтва БАЖ сустрэлася з прэзідэнтам і генеральным сакратаром Еўрапейскай федэрацыі журналістаў

Пра гэта было заяўлена на адмысловай антыкрызіснай сустрэчы ЕФЖ і БАЖ, прысвечанай працягу эфектыўнага супрацоўніцтва арганізацый.

Па словах прэзідэнта ЕФЖ Могенса Бліхера Б’ерэгарда, еўрапейская журналісцкая супольнасць цудоўна разумее сітуацыю з пераследам журналістаў у Беларусі і вельмі складанымі ўмовамі працы медыя пад ціскам уладаў. У такіх варунках еўрапейскія журналісцкія арганізацыі заўсёды будуць салідарныя з нашымі калегамі і гатовыя рабіць усё магчымае для падтрымкі журналістаў і сябраў БАЖ.

Удзел у сустрэчы ўзялі таксама старшыня Літоўскага саюза журналістаў Дайнюс Радзявічус, які многія гады быў і застаецца стратэгічным партнёрам БАЖ, а таксама кіраўнік Незалежнай асацыяцыі журналістаў Сербіі Жэліко Бадрожыч.

Прадстаўнікі Еўрапейскай федэрацыі журналістаў падкрэслілі, што БАЖ застаецца і будзе заставацца паўнавартасным сябрам ЕФЖ, працягне шчыльнае супрацоўніцтва ў межах міжнароднай журналісцкай супольнасці ў выглядзе канкрэтных дзеянняў і праграм.

А старшыня БАЖ Андрэй Бастунец на наступным тыдні выступіць з дакладам аб сітуацыі з Беларусі на штогадовым кангрэсе ЕФЖ у Загрэбе.

Неўзабаве ў БАЖы будзе выпрацаваны і новы механізм атрымання сябрамі арганізацыі міжнародных прэс-карт з улікам таго, што сябры аб’яднання знаходзяцца ў розных краінах.