Мінінфарм прызнаў «экстрэмісцкай» старонку «Радыё Свабода | Беларусь» у Threads

27 студзеня 2026 года Міністэрства інфармацыі Беларусі ў чарговы раз папоўніла Рэспубліканскі спіс экстрэмісцкіх матэрыялаў.

Фота: «Радыё свабода»

Старонка «Радыё Свабода | Беларусь» у Threads (ідэнтыфікатар threads.com/@radiosvaboda) прызнаная «экстрэмісцкай інфармацыйнай прадукцыяй» паводле рашэння суда Жлобінскага раёна Гомельскай вобласці ад 23 студзеня 2026 года.

Сайт «Радыё Свабода» заблакаваны на тэрыторыі Беларусі ад жніўня 2020 года. У 2021 годзе «экстрэмісцкімі матэрыяламі» былі прызнаныя акаўнты медыя ў Telegram, YouTube, Face­book, Insta­gram і «Укантакце».

У 2022 годзе да «экстрэмісцкіх матэрыялаў» была далучаная сімволіка «Радыё Свабода» – выява паходні памаранчавага колеру.

У 2023 годзе ў «экстрэмісцкі» спіс былі ўнесеныя сайт «Радыё Свабода», старонкі ў Twit­ter, Telegram, YouTube і Tik­Tok.

Ад снежня 2021 года інтэрнэт-рэсурсы «Радыё Свабода» таксама прызнаныя «экстрэмісцкім фармаваннем».

27 студзеня 2026 года «экстрэмісцкі спіс» папоўніла старонка ў Face­book «Офис Светланы Тихановской» (ідэнтыфікатар facebook.com/SviatlanaTsikhanouskayaOffice). Рашэнне 22 студзеня прымаў Ленінскі суд Брэста.

Суд Лельчыцкага раёна Гомельскай вобласці таксама 23 студзеня прызнаў «экстрэмісцкай» песню «Я страляў у міліцыянта» гурта «Крамбамбуля».