Навіны

Суд над палітзняволеным журналістам і актывістам незарэгістраванага ўладамі Саюза палякаў Беларусі Андрэем Пачобутам мусіў быў пачацца 9 студзеня. Аднак, як стала вядома Беларускай асацыяцыі журналістаў, разгляд справы зноў перанеслі — гэтым разам на 16 студзеня.

У судзе Ленінскага раёна Мінска сёння, 5 студзеня, распачынаецца суд "па справе Вясны". Паводле ч. 4 арт. 228 ("кантрабанда арганізаванай групай") і ч. 2 арт. 342 Крымінальнага кодэкса ("фінансаванне групавых дзеяннях, якія груба парушаюць грамадскі парадак") судзяць чатырох праваабаронцаў:  старшыню Праваабарончага цэнтра "Вясна" і Нобелеўскага лаўрэата Алеся Бяляцкага, яго намесніка Валянціна Стэфановіча і каардынатара кампаніі "Праваабаронцы за свабодныя выбары" Уладзіміра Лабковіча, а таксама завочна Змітра Салаўёва, які вымушаны быў пакінуць Беларусь. 

Пра гэта паведамляе ПЦ "Вясна"

Праект «Кошт урада», закліканы спрыяць фінансава-эканамічнай граматнасці насельніцтва, прывёў прыклад эвалюцыі прыярытэтаў кіраўніцтва Беларусі, кардынальна перагледжаных з 2020 года. Сярод навацый — узмацненне прапагандысцкіх пазіцый нават ва ўрон іншым сферам. 

Генеральная пракуратура на сваім сайце паведаміла пра накіраванне ў суд крымінальнай справы ў дачыненні да Сцяпана Пуцілы, Яна Рудзіка і Рамана Пратасевіча. Апошні ўжо больш за паўтара года знаходзіцца пад хатнім арыштам у Мінску, два першыя жывуць у Варшаве, іх справы разглядаліся на падставе так званай “спецвытворчасці”. 

На сайце Міністэрства інфармацыі Беларусі чарговае папаўненне: “экстрэмісцкімі матэрыяламі” прызнаны шэраг сацсетак папулярнага інтэрнэт-рэсурсу KYKY. Гэта ж тычыцца і фірмовага лагатыпу рэдакцыі.