Навіны

Журналіста вінавацяць у працы без акрэдытацыі за выхад у прамы эфір праграмы “Главное” 25 траўня. Суд па справе журналіста «Настоящего времени» Рамана Васюковіча перанеслі на 6 ліпеня.

Член парламента Ірландыі Сін Хогі (Séan Haughey) узяў апеку над беларускім палітвязнем, журналістам Дзянісам Івашыным.

У Мінскім гарадскім судзе 1 ліпеня працягнулі разгляд справы Мікалая Дзядка. Яго вінавацяць па трох артыкулах Крымінальнага кодэкса.  Дзядок сваю віну не прызнае. На мінулым пасяджэнні выслухалі сведак і зачытвалі матэрыялы справы. Цяпер суд перайшоў да агляду рэчавых доказаў. А пасля Мікалай Дзядок даў паказанні. Мікола Дзядок — аўтар «Новага Часу», блогер, актывістам анархісцкага руху. Міколу Дзядка затрымалі позна ўвечары 11 лістапада 2020 года супрацоўнікі ГУБАЗіК і МУС у загарадным доме ў пасёлку Сасновы. Прад'яўленыя абвінавачванні: арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадзкі парадак, альбо актыўны ўдзел у іх; арт. 361 Крымінальнага кодэкса — Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь; арт. 295 Крымінальнага кодэкса — Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў

Наталля Казей — былая карэспандэнтка дзяржаўнага тэлебачання. Яна 12 гадоў адпрацавала на тэлеканале «Мір», пасля перайшла на АНТ. Але цяпер Казей разам з мужам і дачкой у Германіі. Наталля і яе муж Міхаіл Максімаў у жніўні 2020 года падтрымалі забастоўку работнікаў канала і сышлі з АНТ, а сёлета з'ехалі з Беларусі праз пагрозу крымінальнай справы. 

Да незалежнага аналітыка і рэдактара  "Беларускага штогодніка" Валерыі Касцюговай прыйшлі з ператрусам, паведамляе ў Facebook кіраўнік варшаўскага Цэнтра палітычнага аналізу і прагнозу Павел Усаў. Паводле інфармацыі Усава, вобшук у Касцюговай рабілі супрацоўнікі КДБ. Валерыя затрыманая.

ГА «Беларуская асацыяцыя журналістаў» прасіла Міністэрства ўнутраных спраў, Міністэрства аховы здароўя і Дэпартамент выканання пакаранняў шпіталізаваць зняволенага журналіста Андрэя Пачобута, які ў турме захварэў на Covid-19, а да таго ж мае праблемы з сэрцам.

Да журналіста-фрылансера Змітра Лупача 29 чэрвеня прыехаў маёр міліцыі Віталь Кукавенкаў і склаў на яго адміністрацыйны пратакол  за супрацу з тэлеканалам “Белсат” без акрэдытацыі — арт. 23.5 КаАП. Падставай для завядзення справы стаў фельетон “Міністэрства замежных спраў трэба распусціць”.

Журналістку «Народнай Волі» Глафіру Жук адлічылі з факультэта журналістыкі БДУ пасля таго, як яна адбыла 30 сутак арышту. Учора яна выйшла на свабоду.