Навіны

У Мінску судзілі журналістаў, якія былі затрыманыя 27 жніўня падчас масавых мірных пратэстаў. Суды адбыліся над журналістамі: Андрэем Ярашэвічам, Аляксандрам Васюковічам, Кацярынай Андрэевай, Максімам Гарчанком. На іх склалі пратколы за ўдзел у несанкцыянаванай акцыі  (арт. 23.34 КаАП). Працэсы ішлі па відэасувязі, то бок журналістаў у будынак суда не прывезлі. Урэшце ўсе чацвёра журналістаў — Андрэй Ярашэвіч, Аляксандр Васюковіч, Кацярына Андрэева ​​і Максім Гарчанок — былі адпушчаныя на свабоду. Іх адпусцілі з РУУС, бо суд адправіў усе чатыры адміністрацыйныя справы па 23.34 КаАП на дапрацоўку.

У Следчым камітэце па Гродзенскай вобласці 26 жніўня адбыўся допыт гродзенскага журналіста-фрылансера Аляксея Кайрыса, які супрацоўнічае з тэлеканалам “Белсат”. За дзень да гэтага журналіста па тэлефоне выклікалі ў пракуратуру з нагоды масавых акцый пратэсту ў Гродне, удакладнялі абставіны знаходжання журналіста на гэтых мерапрыемствах. Журналіст патлумачыў, што выконваў выключна свае прафесійныя журналісцкія абавязкі, прадстаўнік пракуратуры паабяцаў, што больш турбаваць яго не будуць.

У Мінску пасля акцыі на Плошчы Незалежнасці вечарам 26 жніўня знік журналіст Арцём Лява.

Рэдактарка і вядучая праграмы "Время АРТ" Таццяна Іваноўская і галоўны інжынер Уладзімір Зайцаў тры дні таму  абвясцілі пра далучэнне да агульнанацыянальнай забастоўкі. З 24 жніўня яны прыходзілі на працу, але не прыступалі да выканання працоўных абавязкаў. Кіраўніцтва тэлерадыёкампаніі прапанавала ім альбо спыніць страйк, альбо звольніцца па ўзгадненні бакоў. Абодва супрацоўнікі выбралі апошні варыянт.

У другой палове дня 26 жніўня ў Слонімскі раённы аддзел Следчага камітэта па тэлефоне выклікалі на допыт карэспандэнта “ГС” Яўгена Валадашчука.