Бюро: Новае медыя Times.by звязанае з «Сінезіс» — кампаніяй, якая дапамагае ў рэпрэсіях

Беларуская група IT-кампаній «Сінезіс», якая пастаўляе тэхніку для платформы распазнавання твараў Kipod і знаходзіцца пад санкцыямі ЕС і Вялікабрытані, можа стаяць за стварэннем новага інфармацыйнага парталу Times.by, лічуць расследавальнікі «Бюро». Пра з’яўленне гэтага медыя ў беларускай інфармацыйнай прасторы БАЖ пісаў на пачатку студзеня.

Выданне Times.by пазіцыянуе сябе як «мультымедыйны інтэрнэт-рэсурс пра самае важнае і цікавае ў Беларусі і свеце». Яно належыць кампаніі ЗАТ «Таймс Медыя Груп», якая была зарэгістраваная ў ліпені 2025 года.

Паводле інфармацыі крыніцы «Бюро», летась уладальнікі групы кампаній «Сінезіс» вырашылі стварыць уласнае буйное медыя, каб скласці канкурэнцыю недзяржаўным выданням, што засталіся ў Беларусі.

Форма ЗАТ не прадугледжвае раскрыцця акцыянераў праз агульнадаступныя базы дадзеных. І хто менавіта валодае кампаніяй, дакладна невядома.

Аднак «Бюро» знайшло факт, які паказвае на тое, што выданне Times.by звязанае з групай кампаній «Сінезіс». Пры рэгістрацыі дамена times.by быў пазначаны email times@altezza.org. Гэты дамен выкарыстоўваецца як карпаратыўная пошта ў структурах, звязаных з «Сінезісам».

Электронная пошта на дамене altezza.org, указаная пры рэгістрацыі дамена times.by. Крыніца: анлайн-сэрвіс Whois