Памёр Марцін Пар — фатограф, які навучыў свет смяяцца з сябе. На пачатку 2010‑х творца наведаў Мінск

На 74‑м годзе жыцця памёр сусветна вядомы брытанскі фатограф-дакументаліст, член агенцтва Mag­num Pho­tos, Марцін Пар (Mar­tin Parr). Пра яго смерць паведаміла Mar­tin Parr Foun­da­tion. Смерць выбітнага мастака стала велізарнай стратай для сусветнай арт-супольнасці.

Марцін Пар. Фота: AFP/Getty

Марцін Пар увайшоў у гісторыю фатаграфіі як майстар сатырычнага, яркага і дэталёвага дакументалізму, які змяніў уяўленне пра жанр.

Творца быў вядомы тым, што адышоў ад традыцыйнай чорна-белай дакументалістыкі, выкарыстоўваючы насычаныя колеры і ўспышку. Ён фіксаваў феномен масавага турызму, глабалізму, спажывецтва і звычайны побыт, знаходзячы ў іх абсурднае і смешнае.

Найвядомейшая серыя фатографа — The Last Resort, Small World, Com­mon Sense, British Food — навучылі цэлае пакаленне фатографаў паказваць рэчаіснасць не толькі з жалем, але і з іроніяй, пакінуўшы невычэрпную спадчыну ў візуальнай культуры.

Марцін Пар, з серыі Small World. 1990 год

Марцін Пар, з серыі The Last Resort

Марцін Пар, з серыі The Last Resort

Важна адзначыць, што ў 2014 годзе Марцін Пар наведваў Мінск у якасці спецыяльнага госця фестывалю «Месяц фатаграфіі ў Мінску» па запрашэнні куратара падзеі Андрэя Лянкевіча. Падчас візіту творца выступіў з лекцыяй і сустракаўся з беларускімі фатографамі, падкрэсліўшы сваю зацікаўленасць у падтрымцы беларускай фатаграфіі.

На прэс-канферэнцыі Пар тады падзяліўся сваім бачаннем Беларусі 2010‑х:

«Мне вельмі спадабалася ў Беларусі. Тут усё па-іншаму, чым у Расіі. Тут яшчэ шмат рэчаў, якія нагадваюць пра Савецкі Саюз, але пры гэтым вы вельмі хутка рухаецеся да еўрапейскага спажывецкага грамадства. Гэта вельмі цікавы пераходны перыяд для фатаграфавання», — сказаў ён.

Марцін Пар у Мінску. Фота: Уладзімір Парфянок

У галерэі «У нескладовае» экспанавалася выстава брытанскага фатографа, якая ўяўляла сабой падборку праектаў з розных этапаў ягонай творчасці. Мэтай выставы было прадэманстраваць унікальны стыль аўтара і метадалогію дакументавання спажывецкага грамадства і забаўляльнай культуры ва ўсім свеце.

Як адзначыў Фонд фатографа, разам з Mag­num Pho­tos яны будуць працаваць разам для таго, каб захаваць і дзяліцца спадчынай Марціна Пара. Больш падрабязная інфармацыя на гэты конт будзе апублікавана пазней.