Пракуратура Віцебшчыны ў 2025 годзе накіравала 169 заяў аб прызнанні інтэрнэт-рэсурсаў «экстрэмісцкімі»

Пасля яны ў адпаведнасці з судовымі рашэннямі, былі ўключаны ў Рэспубліканскі спіс экстрэмісцкіх матэрыялаў. Ніводзін рэгіянальны суд не запярэчыў — усе пазовы органаў пракуратуры былі задаволеныя.

Фота: ana­log­i­cus для pexels.com

Толькі Віцебская абласная пракуратура падрыхтавала 23 звароты ў суд. Да прыкладу, менавіта з яе ініцыятывы «экстрэмісцкімі матэрыяламі» былі прызнаныя сайт кінафестывалю «Паўночнае ззянне» і старонка ў Face­book яго заснавальніцы Вольгі Чайкоўскай «Volia Cha­jk­ouskaya». Паводле службы інфармацыі пракуратуры, прыкметай «экстрэмізму» стала тое, што на кінафестывалі «дэманструюцца фільмы пра падзеі, звязаныя з правядзеннем несанкцыянаваных масавых мерапрыемстваў» у 2020 годзе.
 
Апрача гэтага, Віцебская абласная пракуратура ініцыявала прызнанне «экстрэмісцкімі матэрыяламі» 6‑ці акаўнтаў у Face­book, 5 каналаў і відэаролікаў на YouTube, 1 акаўнт у Tik­Tok, 3 Telegram-чаты і каналы, 3 акаўнты ў Insta­gram, 3 – у «ВКонтакте», 2 – у «Одноклассники».

Аднак кожная заява з пракуратуры, якую суды разбіраюць на адным пасяджэнні, можа ўтрымліваць звесткі пра некалькі  інтэрнэт-рэсурсаў. Таму колькасць зваротаў у суды значна меншая за колькасць прызнаных «экстрэмісцкімі» сайтаў і старонак у сацсетках.

У ліку «лідараў» па вынясенні рашэнняў аб прызнанні інтэрнэт-рэсурсаў «экстрэмісцкімі» апынуўся суд Полацкага раёна і горада Полацка. Базуючыся на зваротах з пракуратуры, ён прызнаў «экстрэмісцкай інфармацыйнай прадукцыяй» 28 старонак у розных сацыяльных сетках і месенджарах. У тым ліку старонку з назвай vitebsk.news у Tik­Tok, дзе размяшчаюцца відэаролікі паводле мясцовых навін.

«Пашчыравала» і пракуратура ў Чашніках: летась 14 студзеня суд Чашніцкага раёна пастанавіў лічыць «экстрэмісцкай» суполку з назвай  «Новости из TUT.BY» у сацсетцы «Одноклассники», а на працягу першых трох месяцаў 2025 года ён прызнаў «экстрэмісцкай інфармацыйнай прадукцыяй» 12 інтэрнэт-рэсурсаў. У асноўным гэта былі сацсеткі адукацыйнах праектаў.  

Зрэшты, 169 заяў аб прызнанні «экстрэмісцкімі» на запыт пракуратур Віцебшчыны – гэта зусім не рэкорд. Так, пракуратуры Мінскай вобласці сёлета падалі 334 заявы наконт прызнання інфармацыйнай прадукцыі «экстрэмісцкімі» матэрыяламі.