На польскім фестывалі прэзентавалі кнігі беларускіх фатографаў

Прэзентацыя беларускіх фотакніг адбылася на Ryb­nik Foto Fes­ti­val, які праходзіў з 28 па 30 сакавіка ў горадзе на поўдні Польшчы. Пра дзейнасць беларускіх аўтараў і сітуацыю з фотакнігамі ў Беларусі распавялі зацікаўленай аўдыторыі прадстаўнікі платформы беларускай фатаграфіі ў Варшаве — ФШ1.

Каманда ФШ1 — Кацярына Ігнашэвіч, Марыя Карнеенка, Яўген Атцецкі — на фотафестывалі ў Рыбніку. Фота: Кацярыны К.

На польскі Ryb­nik Foto Fes­ti­val — адметны фотафэст, які ладзіцца ў Польшчы з 2004 года — беларуская платформа ФШ1 трапіла ў выніку наладжвання супрацоўніцтва. Конкурс праектаў форуму выйграла беларуская мастачка Марыя Карнеенка, якая ўваходзіць у каманду ФШ1.

І натуральным чынам у фатографаў беларускай платформы ўзнікла ідэя прыехаць на фестываль з прэзентацыяй беларускіх фотакніг — прапанову з энтузіязмам падтрымалі арганізатары польскай фотападзеі.

Фотакнігі беларускіх аўтараў на фотафестывалі ў Рыбніку. Фота: Кацярыны Ігнашэвіч

На фестывалі былі прадстаўлены фотакнігі архіву Veha, «Гісторыя беларускай фатаграфіі» Антаніны Сцебур і Ганны Самарскай, «Больше, чем Я» Вольгі Бубіч, «Доўгая дарога дамоў» Машы Мароз, выданні і альбомы іншых аўтараў.

Як падзялілася з Reform.news Марыя Карнеенка, прэзентацыя фотакніг беларускіх аўтараў прайшла ў Рыбніку з поспехам.

Каманда ФШ1 з мастацкім дырэктарам фотафестывалю ў Рыбніку Марцінам Гіба (Marcin Giba) і арганізацыйнай дырэктаркай фэсту Нінай Гіба (Nina Giba) (у цэнтры). Фота: Кацярыны К.

— Наведвальнікі фестывалю падыходзілі да нашага стала, пыталіся пра ўсе праекты, глядзелі ўсе кнігі. Прывезлі мы з сабой 18 выданняў, але толькі 5 з 18 былі прадстаўлены да продажу. Па выніку наведвальнікі купілі 9 кніг. Цікавасць была жывая: людзі падпісваліся ў сеціве на беларускіх аўтараў тут жа. Водгукі на беларускую фатаграфію былі вельмі станоўчымі.

Таксама атрымалі некалькі прапаноў аб супрацоўніцтве, — дадае Марыя. — Да прыкладу, з’явілася магчымасць прадаваць беларускія фотакнігі ў краме пры адной чэшскай галерэі.

Падчас прэзентацыі платформы ФШ1 і беларускай незалежнай фатаграфіі на фотафестывалі. Фота: Кацярыны Ігнашэвіч

ФШ1 – платформа, асноўнай мэта якой з’яўляецца стварэнне прасторы і ўмоў для вольнай фатаграфічнай творчасці і аб’яднання фатографаў з Беларусі. Платформа займаецца арганізацыяй сустрэч, дыскусій і адукацыйных мерапрыемстваў – лекцый, майстар-класаў і артыст-токаў. У прыярытэтах — будаванне супольнасці, дапамога аўтарам заявіць пра сябе, наладжванне міжнародных сувязяў. ФШ1 пачынала сваю дзейнасць у Беларусі ў 2010‑х — зараз працягвае сваю справу ў Польшчы — у Варшаве.