Супраць блогера Сяргея Бяспалава распачатая «спецыяльная вытворчасць»

Інфармацыю пра гэта апублікаваў тэлеграм-канал Следчага камітэта. У канцы паведамлення 32-гадовага блогера запрашаюць вярнуцца ў Беларусь і прыйсці ў Следчы камітэт.

Сяргей Бяспалаў. Фота: Face­book

«Сёння, у пятніцу 13, я атрымаў «асаблівую ўзнагароду»… Мне заочно прысудзілі 10 крымінальных артыкулаў за маю працу. Гэта, як ні дзіўна, сведчыць не толькі пра рэпрэсіўнасць сістэмы, але і пра тое, што мая праца дасягнула сваёй мэты», — напісаў богер на сваёй старонцы ў Face­book.

Сяргея Бяспалава абвінавачваюць паводле 10 артыкулаў Крымінальнага кодэкса РБ:

• частка  3 артыкула  130 КК (распальванне варожасці);
• артыкул 188 КК (паклёп);
• частка 1 артыкула 293 КК (масавыя беспарадкі);
• частка  1 артыкула  342 КК (актыўны ўдзел у дзеяннях, якія груба парушаюць грамадскі парадак);
• частка  1 артыкула  357 КК (змова ці іншыя дзеянні, учыненыя з мэтай захопу дзяржаўнай улады);
• частка  3 артыкула  361 КК (заклікі да санкцый);
• частка  1 артыкула  361–1 КК (стварэнне экстрэмісцкага фармавання або ўдзел у ім);
• частка  2 артыкула 367 КК (паклёп на прэзідэнта Рэспублікі Беларусь);
• частка  2 артыкула  368 КК (абраза прэзідэнта Рэспублікі Беларусь);
• артыкул  369–1 КК (дыскрэдытацыя Рэспублікі Беларусь).

Цяпер блогер  знаходзіцца па-за межамі Беларусі, але судовыя працэсы ў парадку «спецыяльнай вытворчасці» праводзяцца ў адсутнасць падсуднага.

Сяргей Бяспалаў — блогер і заснавальнік сеткі паблікаў «Мая краіна Беларусь».

4 лістапада суд Баранавіцкага раёна і горада Баранавічы пастанавіў лічыць «экстрэмісцкім» Telegram-канал «BesLive», які вядзе блогер і журналіст Сяргей Бяспалаў.  Рэсурс мае больш за дзве з паловай тысячы падпісчыкаў. Рашэнне прызнаць канал «BesLive» «экстрэмісцкім» вынесла суддзя Святлана Сняжко. Ініцыятарам звароту ў суд стала мясцовая пракуратура, а зацікаўленым бокам на судзе выступіла Міністэрства інфармацыі Беларусі.

У гэты самы дзень два гады таму, 14 лістапада 2022 года, з’явіліся звесткі пра прызнанне «экстрэмісцкімі матэрыяламі» асабістага YouTube-канала Сяргея Бяспалава і яго Telegram-канала «BesLive». Тады гэта адбылося з ініцыятывы пракуратуры горада Мінска.

Раней — у чэрвені 2022 года — Міністэрства ўнутраных спраў Беларусі абвясціла «экстрэмісцкімі фарміраваннямі» Telegram-каналы «Сергей Беспалов», «Мая Краіна Беларусь» и «Усы Лукашенко», да якіх меў дачыненне блогер.