Ігар Казмярчак

Аднолькавыя тэксты пра стваральніка і рэдактара партала orsha.eu з’явіліся 29 жніўня на старонках «Аршанскай газеты» ў «Одноклассниках» і ў «ВКонтакте».  У першай частцы допісаў паведамляецца пра тое, што рэсурсы orsha.eu прызнаныя экстрэмісцкім фармаваннем, і гэта аб’ектыўная інфармацыя. Другая ж частка тычыцца Ігара Казмерчака асабіста, і там напісана, паводле ягонай ацэнкі, «суцэльная хлусня».

Учора пра прызнанне сайта orsha.eu і яго медыярэсурсаў паведаміў Telegram-канал «Книга ГУ «База», позна вечарам 28 жніўня гэтая інфармацыя з’явілася і на сайце Міністэрства  унутраных справаў.

У «пераліку экстрэмісцкіх фарміраванняў» на  афіцыйным сайце МУС інфармацыі пра гэта няма (на 16.30  29.08.2024). Аднак Telegram-канал  t.me/guBAZA сцвярджае, што «рашэннем Міністэрства ўнутраных спраў экстрэмісцкім фарміраваннем прызнана і забаронена дзейнасць на тэрыторыі Беларусі групы грамадзян, аб’яднаных пад назвай «Orsha_eu» на ўсіх інтэрнэт платформах».

Адзін і той самы допіс з фотаздымкам Ігара Казмерчака і подпісам, што ён абвешчаны ў вышук, быў размешчаны на старонках «Аршанскай газеты» ў «Одноклассниках» і ў «ВКонтакте». Выкладзеную ў гэтым тэксце інфармацыю рэдактар незалежнага сайта orsha.eu назваў «дыстыляванай хлуснёй».

Ігар Казмерчак мяркуе, што супраць яго распачалі яшчэ адну крымінальную справу — за ўдзел у перадачах тэлеканала «Белсат». На сёння рэдактар незалежнага рэгіянальнага партала orsha.eu знаходзіцца ў вымушанай эміграцыі.