У Брэсце ў чарговы раз пакаралі штрафам журналістаў-фрылансераў Мілану Харытонаву і Алеся Ляўчука

Мілана Харытонава і Алесь Ляўчук

Гэтым разам нагодай для адміністрацыйнага пераследу стала асвятленне журналістамі акцыі пратэсту супраць будаўніцтва акумулятарнага завода, якая ладзілася 17 лютага на плошчы Леніна ў Брэсце.

Судовае слуханне адбылося 21 сакавіка без удзелу Алеся Ляўчука і Міланы Харытонавай. Журналісты не пайшлі ў суд, бо лічаць гэтыя працэсы палітычна матывыванымі. Пра вынікі разгляду справы яны даведаліся па пошце.

Як паведаміў Алесь Ляўчук, у матэрыялах справы не пазначаны час, калі яны знаходзіліся на плошчы, і не згадваюцца асобы, якія давалі інтэрв’ю. Але гэта ніяк не паўплывала на рашэнне суддзі. 

Дарэчы, каб скласці пратакол, міліцыянты 3 сакавіка ўжылі сілу і некалькі гадзін трымалі журналістаў у пастарунку. Спробы Алеся Ляўчука абскардзіць у пракуратуру і Следчы камітэт гэтыя дзеяннні міліцыі плёну не далі: адтуль скаргу накіравалі ў аддзяленне міліцыі, супрацоўнікі якога і праводзілі затрыманне.

Летась Алеся Ляўчука і Мілану Харытонаву судзілі шэсць разоў, і ўжо чатыры разы — у 2019 годзе. Агульны штраф, накладзены на брэсцкіх журналістаў, складае больш за 10 тысяч долараў у эквіваленце.