Украіна хоча абмяняць Іну Кардаш, якую абвінавацілі ў працы на КДБ

Украіна прымае меры для абмену беларускі Іны Кардаш, якую затрымалі ва Украіне па падазрэнні ў шпіянажы на карысць КДБ. Пра гэта паведамляе «Суспільне» з залы суда, дзе 16 лютага разглядалася скарга на арышт Кардаш.

Іна Кардаш. Фота: facebook.com/ina.kardash

Паводле звестак выдання, інфармацыю аб абмене агучыў пракурор падчас пасяджэння суда. Ён адзначыў, што «прымаюцца меры па яе абмене з беларускім бокам».

«І што, беларускі бок згодны з абменам?» – удакладніла ў яго суддзя Таццяна Каганоўская.

«У мяне няма гэтых звестак, проста гэта цяпер ідзе камунікацыя паміж імі», – адказаў пракурор.

Што тычыцца скаргі на арышт Іны Кардаш, то Кіеўскі апеляцыйны суд адхіліў яе, паколькі палічыў, што дастаткова ўстойлівых сувязяў з Украінай у Кардаш няма. Ёсць муж, але і яго Кардаш спрабавала вербаваць – гэта таксама стала вядома на пасяджэнні. Паводле пракуратуры, падазрэнні ў дачыненні да Кардаш пацвярджаюцца запісамі праслухоўвання, а таксама экспертызай, якая пацвердзіла, што Кардаш перасылала куратарам таемныя дакументы. Такім чынам, яна застаецца пад вартай.

Кардаш прымала ўдзел у пасяджэнні па відэасувязі з СІЗА. У кароткай прамове яна сказала, што не збіраецца нікуды ўцякаць, і ў яе замежным пашпарце няма віз, каб гэта зрабіць. Таксама «Суспільне» папрасіла яе пракаментаваць справу, аднак Кардаш адмовілася.

Кардаш працавала журналісткай ва Украіне з 2019 года, спачатку на тэлеканале 112, а затым у «Інтэрфакс Украіна». Паводле версіі следства, з таго ж года яна ўвесь час кантактавала з грамадзянінам Беларусі, «які ажыццяўляў канфідэнцыйнае супрацу з беларускімі спецслужбамі».

У 2025 годзе яна падпісала кантракт з Галоўным упраўленнем разведкі Украіны і ўладкавалася ў каардынацыйны штаб па пытаннях абыходжання з ваеннапалоннымі. Там яна фатаграфавала сакрэтныя дакументы і адпраўляла куратару з КДБ, сцвярджае следства.

Раней СБУ паведамляла, што Кардаш працуе на КДБ з 2015 года.

Шпіёнка КДБ выкарыстоўвала інтымныя зносіны ў аператыўнай дзейнасці ва Украіне, — следства