За каментар у Аднакласніках жанчыну асудзілі на 1,5 года хатняй хіміі. Пацярпелы міліцыянер збіраецца пакараць усіх 97 каментатараў

Справу вяла суддзя Алена Нямкова, бок дзяржабвінавачвання прадстаўляў пракурор Дзмітрый Яфімаў. Пацярпелым па справе праходзіў маёр міліцыі з Драгічынскага РАУС Юры Чарнышкоў.

Абвінавачаная абараняла сябе сама, ад паслуг адваката адмовілася.

Паводле абвінавачвання, Таццяна Дзямідчык 14 жніўня 2020 года пакінула каментар у сацыяльнай сетцы «Аднакласнікі» пад фота Юрыя Чарнышкова. Згодна з ацэнкай эксперта, каментар утрымліваў негатыўную ацэнку супрацоўніка міліцыі.

На строгім прысудзе для Дзямідчык міліцыянер не настойваў, але запрасіў кампенсацыю нанесенай маральнай шкоды ў памеры 2000 рублёў, бо моцна пацярпеў яго імідж.

Аказалася, што пад фота з выявай Чарнышкова, было пакінута 97 каментароў, усіх вінаватых ён збіраецца знайсці і прыцягнуць да адказнасці. Суд над Таццяна Дзямідчык — гэта ўжо пяты працэс, дзе Юры Чарнышкоў праходзіць пацярпелым.

Абвінавачая пагадзілася з выплатай кампенсацыі, але адзначыла, што сума для выплаты вельмі вялікая, бо яе заробак складае толькі 250 рублеў.

Пасля азнаямлення з пісьмовымі матэрыяламі справы, пракурор Дзмітрый Яфімаў у спрэчках бакоў прасіў прызначыць пакаранне для Таццяны Дзямідчык у выглядзе абмежавання волі без накіравання ў папраўчую ўстанову тэрмінам на адзін год і шэсць месяцаў, а таксама задаволіць іск на кампенсацыю маральнай шкоды з прынцыпаў разумнасці і справядлівасці.

У выніку суд пастанавіў прызнаць Таццяну Дзямідчык вінаватай у здзясненні злачынства па арт. 369 Крымільнага кодэкса і пакараў яе 1,5 «хатняй хіміі». Акрамя таго жанчына павінна выплаціць кампенсацыю пацярпеламу ў памеры 1500 рублёў.