Журналіст Дзяніс Івашын супраць “рускага свету” ў Гродне

Па словах Дзяніса Івашына, усё пачалося з таго, што ён даведаўся пра грамадзяніна Беларусі, які займаецца актыўнай канцэртнай дзейнасцю ў краіне і мае пэўнае дачыненне да расійскіх аккупацыйных сіл ва Украіне (на тэрыторыі Крыма і Данбаса):

— З крыніц у адкрытым доступе высветліў, што Аляксей Нежавец з’яўляецца прапагандыстам “рускага свету”, незаконна перасякае дзяржаўную мяжу Украіны, патрапляе ў Данецк і Луганск, на часова акупаваныя тэрыторыі. Ён непасрэдна займаецца падтрымкай маральна-псіхалагічнага стану расійскіх падраздзяленняў, наведвае вайсковыя шпіталі, дзе ляжаць гэтыя параненыя “баевікі”. Ён часта з’яўляецца ў эфіры СМІ акупацыйнай адміністрацыі. Я нават вызначыў, што яму быў уручаны дыплом ад так званага “міністэрства інфармацыі ДНР” за “значны ўнёсак у прарыве інфармацыйнай блакады ДНР”.

— Ваша расследаванне пра Аляксея Нежаўца з’явілася на сайце супольнасці “Інформнапалм”, што адбылося далей.

— Перадусім гэтая інфармацыя была дасланая ў органы дзяржкіравання: ва ўпраўленні ідэалогіі, культуры і справам моладзі Гродзенскага гарвыканкама, аблвыканкама. Таксама сувязь падтрымлівалася з гродзенскім Драматычным тэатрам, дзе мусіў выступіць Аляксей Нежавец. І непасрэдна ў расследаванні была інфармацыя, каб людзі праяўлялі сваю грамадзянскую пазіцыю і звярталіся ў дзяржорганы.Мяркую, што вось гэтая цвёрдая грамадзянская пазіцыя і паўплывала на адмену канцэрта Аляксея Нежаўца.

— Ці будзеце вы далей сачыць за лёсам гэтага чалавека, калі ён будзе далей рабіць канцэрты па тэрыторыі Беларусі?

— Да мяне ўжо паступае інфармацыя, што ў красавіку ён запланаваў свой канцэртны тур на Полаччыне. Я буду сачыць за гэтай сітуацыяй і заклікаю актывістаў і журналістаў з Полаччыны праявіць сваю грамадзянскую пазіцыю, каб спыніць яго канцэртную дзейнасць.

Журналіст Дзяніс Івашын з’яўляецца рэдактарам беларускай службы інфармацыйнай супольнасці Інформнапалм, яго расследаванні і артыкулы тычацца ў асноўным сітуацыі ва Украіне, удзелу беларускіх грамадзян у незаконных фармаваннях на Данбасе.