Журналіст-фрылансер Кастусь Жукоўскі адмаўляецца “бараніць рэжым” на вайсковых зборах

“Я згубіў агулам пятнаццаць дзён, і сёння заявіў у ваенкамаце, што час ужо кампенсаваць мне згублены час. Дык лекар Ігар Арлоў пагражаў звярнуцца ў пракуратуру на мае паводзіны, адправіць нават на псіхіятрычную экспэртызу, хоць зусім нядаўна сам даў мне заключэнне, што я псіхічна здаровы”, — распавёў службе маніторынгу ГА “БАЖ” Кастусь Жукоўскі.

З ваенкамата фрылансер вёў стрым, у якім выказаў меркаванне, што, выкарыстоўваючы вайсковую структуру, КДБ наўмысна «мурыжаць» яго са зборамі, каб не займаўся журналістыкай.

Па словах Жукоўскага, раней у ваенкамаце тлумачылі, што беларускай арміі надзвычай патрэбныя наводчыкі-танкісты. Менавіта такую спецыяльнасць меў Жукоўскі, калі праходзіў тэрміновую службу. Цяпер Жукоўскага спрабуюць прызваць на нейкую “базу захоўвання”.

Але былы танкіст-наводчык заявіў, што наагул не збіраецца абараняць “рэжым, які раздзярбаніў краіну”. На пытанне Жукоўскага, ці могуць забяспечыць яму ў войску дыетычнае харчаваннне, як рэкамэндуюць медыкі ў сувязі з ягоным станам зароўя, супрацоўнікі ваенкамата адказвалі адмоўна.

Падчас уручэння позвы на зборы, якія плануюцца на канец ліпеня, Жукоўскі паўтарыў, што не збіраецца “бараніць рэжым” на шкоду свайму здароўю.