Журналістку Кацярыну Андрэеву з гомельскай калоніі перавялі ў СІЗА ў сувязі з «працэсуальнымі дзеяннямі»

Гэта вынікае з лістоў ёй, якія вяртаюцца адрасатам. У той жа час ні сям’я, ні адвакаты пакуль не ведаюць, дзе Кацярына.

Кацярыну Андрэеву перавялі ў СІЗА ў сувязі з «працэсуальнымі дзеяннямі». Яе статус невядомы

Муж журналісткі Ігар Ільяш пацвердзіў, што Кацярыны ў калоніі няма — яе перавялі ў гомельскі СІЗА.

«Так, сапраўды, Каці няма ў папраўчай калоніі — з 10 лютага яна знаходзіцца ў СІЗА №3 г. Гомля. Я не распаўсюджваў гэтую інфармацыю, бо спадзяваўся спачатку нешта даведацца па сутнасці, разабрацца, што адбываецца. Але ўсё марна. На сённяшні дзень я ведаю толькі тое, што яе перавялі ў СІЗА ў сувязі з нейкімі «працэсуальнымі дзеяннямі».

Раней палітзняволеную Наталлю Хершэ з ІК‑4 перавялі ў крытую турму, пастрожыўшы ёй рэжым.

Кацярына Андрэева (Бахвалава) і Даша Чульцова — журналісткі тэлеканала «Белсат». Дзяўчатам прысудзілі па два гады калоніі за стрым з акцыі развітання з Раманам Бандарэнкам у лістападзе 2020 года ў Мінску.