Журналісту Алесю Сабалеўскаму далі 8 сутак. Ён аб’явіў галадоўку

Алесь Сабалеўскі быў затрыманы міліцыяй 30 жніўня падчас выканання прафесійных абавязкаў — у момант, калі вёў анлайн-рэпартаж з пратэстнага шэсця ў горадзе.

Суддзя Вікторыя Палякова на падставе міліцэйскага пратакола прызнала Сабалеўскага вінаватым у парушэнні ч. 1 арт. 23.34 КаАП. “Вёў анлайн і такім чынам прыняў удзел у несанкцыянаванай акцыі”, — прыйшла да высновы суддзя.

Судовы працэс пачаўся сёння а 16.15, суддзя зрабіла перапынак на 15 хвілін, каб даць журналісту азнаёміцца з матэрыяламі справы. Бо, паводле яго слоў, да суда яму не паказалі ніякіх дакументаў.

У часе слухання Алесь Сабалеўскі тлумачыў, што не прымаў удзел у вулічнай акцыі, а асвятляў яе па заданні рэдакцыі. Але суддзя не прыняла яго слоў да ўвагі. Журналіст адразу пасля абвяшчэння судовага рашэння ўзяў галадоўку. Вынікі суда ён лічыць неправавым і разглядае як пераслед за прафесійную дзейнасць. 

Нагадаем, Алеся Сабалеўскага затрымалі ўвечары ў нядзелю. Амаль суткі нічога не было вядома пра яго месца знаходжання. Толькі позна ўвечары 31 жніўня калегі даведаліся, што Алеся затрымалі міліцыянты і даставілі ў ізалятар часовага ўтрымання.