Журналісты атрымалі ўзнагароды Аб’яднанага пераходнага кабінету

Аб’яднаны пераходны кабінет узнагародзіў медалямі 9 выбітных асобаў. Сярод іх ёсць журналісты.

Медаль «За плённую працу на карысць Беларусі». Фота: Аб’яднаны пераходны кабінет Беларусі

Адпаведная пастанова падпісаная 7 студзеня кіраўніцай АПК Святланай Ціханоўскай. Лаўрэаты намінаваліся грамадскімі арганізацыямі і актывістамі і былі ўхваленыя Камісіяй па ўзнагародах пры АПК. 

Журналіст Мікіта Мелказёраў пасмяротна ўзнагароджаны медалём «За плённую працу на карысць Беларусі». Арамя яго, гэты медаль атрымалі

• нямецкі журналіст і пісьменнік, кіраўнік сфакусаванай на беларускай тэматыцы рэдакцыі медыя dekoder.org Інга Пэтц,
• украінскі даследчык — адзін з арганізатараў Форуму імя Астрожскіх у 2022–2025 гадах Яраслаў Чарнагор,
• літоўскі гісторык — сузаснавальнік Міжнароднага кангрэса даследчыкаў Беларусі Русціс Камунтавічус.

Медалём «Няскораных» (Ларысы Геніюш) за асабістую адвагу, стойкасць і ахвярнасць у дзейнасці на карысць прасоўвання ідэалаў дэмакратыі і правоў чалавека ў Беларусі ўшанаваныя:

• журналіст і блогер Ігар Лосік,
• праваабаронца, юрыст праваабарончага цэнтру «Вясна» Уладзімір Лабковіч.
• лінгвістка, перакладчыца Наталля Дуліна.

Крыжом Дабрасуседства за развіццё публічнай дыпламатыі і пашырэнне дыялогу паміж беларускім і іншымі народамі ўганараваныя:

• польскі дзяржаўны дзеяч і прафсаюзны актывіст Лех Валенса;
• літоўскі палітык, дзяржаўны і грамадскі дзеяч Вітаўтас Ландсбергіс.

Таксама дзве асобы узнагароджаныя непублічна, адзначылі ў АПК.