Супраць блогера Міколы Дзядка распачалі новую крымінальную справу

Пра гэта яму распавялі бацькі, якіх выклікалі на допыты. Але дакладнага артыкула, паводле якога распачатая справа, Мікола не ведае.

Мікола Дзядок у Вільні, 14 верасня 2025 г. Фота: spring96.org

«Як завіравала жыццё апошнімі днямі! Родным паведамілі пра ўзбуджэнне супраць мяне новай крымінальнай справы. Нібыта за «экстрэмісцкія» публікацыі ці выказванні. Прытым чамусь у Віцебску. Бацькоў цягаюць на допыты», — напісаў Мікола Дзядок на сваёй старонцы ў сацсетцы Тhreads.

Мікола Дзядок – былы журналіст незалежнай газеты «Новы Час», блогер, актывіст анархічнага руху, былы палітвязень. 10 лістапада 2021 года Мінскі гарадскі суд прыгаварыў яго да 5 гадоў пазбаўлення волі, у тым ліку па палітычна матываваных артыкулах.

У траўні 2025 года суд Цэнтральнага раёна Мінска прызнаў «экстрэмісцкай інфармацыйнай прадукцыяй» ягоныя старонкі ў сацсетках  «ВКонтакте», Face­book, Insta­gram, а таксама «экстрэмісцкім» быў прызнаны сайт mikola.noblogs.оrg.

11 верасня 2025 года Міколу Дзядка вызвалілі ў ліку 52 беларускіх палітычных вязняў, якіх прымусова перамясцілі на тэрыторыю Літвы. Па вызваленні ён даў некалькі інтэрв’ю незалежным СМІ пра ўмовы ўтрымання за кратамі і працягвае сваю блогерскую дзейнасць.