• Актуальнае
  • Медыяправа
  • Карыснае
  • Накірункі працы і кампаніі
  • Агляды і маніторынгі
  • Рэкамендацыі па бяспецы калег

    Беларускія ідэолагі прызналі, што «губляюць моладзь» праз тэлеграм-каналы і «дэструктыўныя» СМІ

    Прэзідэнцкая адміністрацыя сабрала калегію на тэму «эфектыўнасці арганізацыі ідэалагічнай і выхаваўчай работы ў вышэйшых навучальных установах», канстатаваўшы «прабелы» ў дзейнасці.

    Акрэсліваючы перад ідэалагічным актывам і высокапастаўленымі чыноўнікамі мэту экстранай нарады, кіраўнік адміністрацыі Ігар Сяргеенка спаслаўся на грамадска-палітычную сітуацыю вакол Беларусі і ўсё большы знешні інфармацыйны ўплыў на моладзь.

    Як падкрэсліў функцыянер, светапогляд фармуюць інтэрнет-тэхналогіі, сацыяльныя сеткі, тэлеграм-каналы і «дэструктыўныя» СМІ.  

    «Распаўсюджаная інфармацыя ў масе сваёй носіць дэструктыўны, разбуральны характар, прывіваючы моладзі чужыя каштоўнасці, спараджаючы негатыўнае стаўленне да грамадства і дзяржавы, правакуючы канфліктныя, а часам і злачынныя паводзіны. Ад таго, якімі каштоўнасцямі кіруюцца сёння нашы студэнты, якія мэты ставяць перад сабой, да якіх ідэалаў імкнуцца, будзе залежаць у тым ліку і наша з вамі будучыня», — спасылаюцца на заклапочанасць Ігара Сяргеенкі праўладныя медыя.

    Паводле вынікаў апытання студэнцкай моладзі, якія і сталі падставай да «трывогі», Інстытут сацыялогіі НАН РБ канстатаваў несуцяшальныя для ўлады тэндэнцыі. Такія каштоўнасці як сумленне, гонар і годнасць у якасці прыярытэтных назвалі 18% апытаных. Любоў да Радзімы — 15,6%. Чалавекалюбства і дапамога людзям — 3%. У той жа час амаль 60%  рэспандэнтаў назвалі сваімі каштоўнасцямі дастатак і грошы. Што, на думку ўладнай вертыкалі, ніяк не ўкладаецца ў ідэалогію «беларускага цуду».

    Але кіраўнік прэзідэнцкай адміністрацыі не знайшоў уласнага рэцэпта,  пераадрасаваўшы да нядаўняй заявы свайго боса Аляксанда Лукашэнкі: глабальная задача адукацыйных устаноў — запоўніць прабелы ў выхаваўчым працэсе, каб «не страшна было перадаваць краіну тым, хто заўтра выйдзе за парог школы ці ВНУ».

    «Як паказвае аналіз, у краіне створана сістэма выхаваўчай работы з моладдзю, якая ўключае кадравае, інфармацыйна-аналітычнае, метадычнае забеспячэнне. Аднак ёсць і праблемныя пытанні — напрыклад, адсутнасць адзінай ідэалагічнай вертыкалі ў ВНУ. Функцыі арганізатараў часта ўскладзены не на кіраўнікоў, намеснікаў дэканаў, а на выкладчыкаў. Як вынік, не праглядаецца адзінага падыходу да планавання і зместу, імпрэзы маюць агульны характар. Назіраецца самае страшнае — фармалізм у арганізацыі мерапрыемстваў ідэалагічнай накіраванасці», — панаракаў Ігар Сяргеенка, згадаўшы пра слаба задзейнічаны «інстытут куратарства».

    Дасталося крытычных выпадаў на адрас БРСМ, які, прызнаў старэйшы калега, так і не стаў «вядучай грамадскай арганізацыяй» ды не ўспрымаецца ні кіраўніцтвам ВНУ, ні самімі студэнтамі.

    Вяртаючыся да несуцяшальнага сацапытання, чыноўнік устрывожыўся,  што фактычна пятая частка маладзёнаў не адносіць сябе да патрыётаў і яшчэ такая ж частка не вызначылася. А непрыхаванае імкненне выехаць за мяжу для атрымання адукацыі ці ў пошуках працы павінна стаць сігналам ужо на аглядную перспектыву, адзначыў ён. Прынамсі наяўнасць такога кшталту праблем — у тым ліку недапрацоўка прафесарска-выкладчыцкага складу ВНУ. Адпаведна, і недастатковая ідэалагічная праца.

    Удзельнікі калегіі, касцяк якой склалі кіроўны склад адміністрацыі, міністэрстваў з падпарадкаванымі ВНУ, рэктары і прарэктары, кіраўнікі профільных камісій палаты прадстаўнікоў, намеснікі старшынь аблвыканкамаў і прадстаўнікі праўладных грамадскіх арганізацый, пагадзіліся, што нельга «ігнараваць наяўныя тэндэнцыі».

    І адзінагалосна адтэрмінавалі калегіяльны вердыкт да атрымання справаздач дзвюх міжведамасных працоўных груп, якія з выездам на месца вывучалі арганізацыю ідэалагічнай работы ў дзесяці ВНУ Мінска і абласных цэнтрах.

    Чытайце яшчэ:

    Прадпрымальніка і выдаўца баранавіцкай газеты «Шаг» эвакуіравалі з Беларусі

    Вечаровы візіт міліцыі да журналіста Анатоля Гатоўчыца — шосты за два гады

    Журналіст-расследавальнік: Ваенным злачынцам цяжка схавацца ў сучасным свеце

    Самыя важныя навіны і матэрыялы ў нашым Тэлеграм-канале — падпісвайцеся!
    @bajmedia
    Найбольш чытанае
    Акцэнты

    Как найти и удалить свои старые комментарии в Instagram, Telegram, YouTube, TikTok и «Вконтакте»

    «Медиазона» подготовила инструкцию по удалению старых комментариев в соцсетях — от Instagram до Youtube.
    12.02.2024
    Акцэнты

    30-годдзе за кратамі — сёння ў зняволенай журналісткі Кацярыны Андрэевай дзень народзінаў

    Кацярына Андрэева мусіла сустрэць «круглую» дату на волі — 5 верасня 2022 года сканчаўся яе несправядлівы тэрмін у калоніі. Але не. 7 красавіка 2022-га сям’і палітзняволенай журналісткі стала вядома, што ёй выставілі новае абвінавачанне. 13 ліпеня 2022 года Кацярыну прызналі вінаватай «у выдачы замежнай дзяржаве, міжнароднай альбо замежнай арганізацыі ці іх прадстаўніку дзяржаўных сакрэтаў Рэспублікі Беларусь». Суддзя Гомельскага абласнога суда Алег Харошка прызначыў ёй яшчэ 8 год пазбаўлення волі.
    02.11.2023
    Навіны

    Теперь консул может только изъять паспорт. Что означает новый указ для белорусов, уехавших из страны?

    05.09.2023
    Кожны чацвер мы дасылаем на электронную пошту магчымасці (гранты, вакансіі, конкурсы, стыпендыі), анонсы мерапрыемстваў (лекцыі, дыскусіі, прэзентацыі), а таксама самыя важныя навіны і тэндэнцыі ў свеце медыя.
    Падпісваючыся на рассылку, вы згаджаецеся з Палітыкай канфідэнцыйнасці