БТ адзначыла ўгодкі БНР?

22 лютага ў праграме «Першага нацыянальнага» былі пазначаны «Торжественное собрание и праздничный концерт, посвященный 90-летию Вооруженных сил Республики Беларусь». Увечары пазваніў узрушаны бацька: «Гэта яны 90-годдзе БНР збіраюцца святкаваць!» — і засмяяўся.

Сапраўды, Дэкларацыя аб суверэнітэце Рэспублікі Беларусь была прынята толькі ў 1990‑м годзе, а БССР абвешчана ў 1919‑м. Значыць, БТ святкавала нейкую іншую дату?

Паглядзім, што адбывалася ў гэтыя дні ў 1918‑м і гадавіну чаго адзначылі «галоўны» тэлеканал і арганізатары святочнага мерапрыемства.

Наўрад ці можна лічыць належнай нагодай першыя і не вельмі паспяховыя баі ледзь сфармаванага расійскага апалчэння з нямецкай арміяй у Эстоніі. І ў Беларусі, здаецца, падзеі адбываліся зусім не святочныя. Па афіцыйнай версіі, менавіта 22 лютага (калі і праводзіліся «Торжественное собрание и праздничный концерт») Мінск быў захоплены войскамі кайзераўскай Германіі. Згадзіцеся, нагода таксама… не вельмі. 

Але!
Па іншых звестках, немцы ўвайшлі ў горад толькі 25-га. І з 19 лютага, калі бальшавікі пакінулі Мінск, па 26-га ўлада належала Выканаўчаму камітэту Рады Усебеларускага З’езду. Вось вам і падстава, спадарства! Дзякуй БТ за напамін! 

Між іншым, поўная назва свята 23 лютага таксама інтрыгуе: «Дзень абаронцаў Айчыны і Узброеных сіл». Вось цікава: а хто тыя мужныя людзі, якія абараняюць не толькі Айчыну, але і яе Узброеныя сілы?