Канферэнцыя Беларускай нацыянальнай платформы «Развіццё Нацыянальнай платформы: новыя стратэгіі»

Беларускія арганізацыі грамадзянскай супольнасці абмяркуюць новы Стратэгічны план развіцця Нацыянальнай платформы на бліжэйшы перыяд

23 красавіка ў Мінску адбудзецца канферэнцыя Беларускай Нацыянальнай платформы «Развіццё Нацыянальнай платформы: новыя стратэгіі».

Адным з кантэкстаў сёлетняй канферэнцыі сталі палітычныя падзеі пачатку красавіка: на паседжанні Каардынацыйнай групы ЕС-Беларусь упершыню за доўгія гады прадстаўнікі грамадзянскай супольнасці ўдзельнічалі ў трохбаковых кансультацыях «ЕС-беларускі ўрад-грамадзянская супольнасць». Ці будзе грамадзянская супольнасць сталым удзельнікам такіх сустрэч?

Як зазначыў у інтэрв’ю нацыянальны каардынатар ФГС УП Улад Вялічка, грамадзянская супольнасць Беларусі можа сёння прапанаваць пэўны экспертны патэнцыял, інавацыі і рашэнні, каб заняць канструктыўную пазіцыю і стаць важнай часткай прагрэсу беларуска-еўрапейскіх адносін. Але для гэтага патрэбна, каб Нацыянальная платформа была не толькі камунікатыўнай пляцоўкай, але стала паўнавартасным грамадска-палітычным актарам у трохбаковых стасунках “ЕС-беларускі ўрад-грамадзянская супольнасць”.

Якім чынам можна вырашыць ключавыя праблемы развіцця БНП? Ці здольныя арганізацыі грамадзянскай супольнасці да салідарных дзеянняў і сумесных кампаній пра прасоўванні грамадскіх інтарэсаў? Ці гатовыя еўрапейскія і іншыя міжнародныя інстытуцыі падтрымаць намаганні БНП?

Прадстаўнікі каля 70 грамадскіх арганізацый збяруцца ў Мінску 23 красавіка на адмысловай канферэнцыі «Развіццё Нацыянальнай платформы: новыя стратэгіі», каб прааналізаваць актуальную сітуацыю, знешнія і ўнутраныя выклікі, з якімі сутыкаецца БНП, а таксама разважыць новыя магчымасці развіцця і актывізацыі дзейнасці, якія паўстаюць пры новых палітычных абставінах.

У працы канферэнцыі БНП прымуць удзел таксама партнёры і зацікаўленыя асобы: кіраўнік Прадстаўніцтва ЕС у Мінску спн. Андрэа Віктарын, рэзідэнт-каардынатар ААН у Беларусі Санака Самарасінха, прадстаўнікі іншых міжнародных інстытуцый.

Асноўныя задачы канферэнцыі — вызначыцца з тэматычнымі напрамкамі ў дзейнасці БНП, прыняць Стратэгічны план на перыяд 2016–2018 гадоў, зацвердзіць Рэгламент БНП як кіраўніцтва ў дзейнасці Нацплатформы. Палітычная мэта канферэнцыі — прыняцце «Дарожнай мапы супрацоўніцтва Прадстаўніцтва ЕС у Мінску і беларускіх НДА”.

Запрашаем журналістаў беларускіх і замежных СМІ да супрацоўніцтва!

Папярэдняя аккрэдытацыя абавязковая. Інфармацыю аб удзеле і Вашыя пытанні просім дасылаць нашаму каардынатару па працы са СМІ:

Юлія Галіноўская: Julia.hurska@gmail.com; +375297422040

Інфармацыя пра месца правядзення будзе дасланая акрэдытаваным журналістам

Праграма