“МедыяЛета-2015” – летнія курсы па асновах журналістыкі

Курсы па фота, відэа, візуалізацыі і PR “МедыяЛета-2015”,  якія ладзяць вядомыя гродзенскія журналісты, стартуюць найбліжэйшымі днямі ў Гродне.

Жыхарам горада, што прыйшлі на сустрэчу ўвечары 1 чэрвеня, прадставілі  вядоўцаў курсаў і распавялі пра будучае навучанне.

Праграма, якую будуць весці Вітаўт і Лана Руднікі, Аляксандр Саенка, Андрэй Фралоў, разлічаная на некалькі тыдняў. Будуць выкладацца асновы фотажурналістыкі, здымкі і мантажу відэа, сувязяў з грамадскасцю (PR), інфаграфікі і візуалізацыі дадзеных. На блогу ўстановы «Цэнтр дадатковай адукацыі дарослых «Студыя карысных кампетэнцый» – арганізатараў «МедыяЛета» – можна даведацца пра спосабы далучэння да курсаў.

– Курсы разлічаныя найперш на людзей, якія цікавяцца рознымі інтэрнэт- тэхналогіямі, новымі медыямі, віртуальным жыццём, – кажа медыяэксперт і журналіст Вітаўт Руднік. – Курс пабудаваны такім чынам, каб людзі маглі атрымаць веды і ўменні, прыдатныя ў розных сферах. Камусьці новыя кампетэнцыі могуць спатрэбіцца для пабудовы кар’еры, камусьці – для прасоўвання бізнесу, а камусьці – проста для забавы, можа, для даследавання свайго радаводу… Спектр дастаткова шырокі, тэхналогіі – універсальныя, таму іх сапраўды можна выкарыстоўваць у самых розных сферах.

– Мой курс фотарэпарцёраў разлічаны для маладзёнаў, што збіраюцца займацца фотажурналістыкай, хочуць патрапіць у свет прэсы і жадаюць атрымаць цікавыя тэарэтычныя і практычныя веды. Я лічу, што інтэнсіўны летні курс дазваляе ў сціслыя тэрміны атрымаць максімальны аб’ём інфармацыі, – так ахарактарызаваў свой курс гродзенскі фатограф, сябра ГА «БАЖ» Аляксандр Саенка.