Супраць магілёўскага журналіста пагражаюць завесці крымінальную справу

Аляксандру Буракову інкрымінуюць дзейнасць ад імя пазбаўленага рэгістрацыі ў Беларусі Праваабарончага цэнтра “Вясна”, бо ён з’яўляецца журналістам магілёўскага праваабарончага сайта mspring.online.

Па словах Буракова, 8 кастрычніка яму патэлефанаваў лейтэнант міліцыі Павел Кот, паведаміў, што праводзіцца праверка і прапанаваў прыйсці на гутарку ў Кастрычніцкі РАУС Магілёва. Журналіст адмовіўся ісці ў РАУС, пакуль не будзе дасланая афіцыйная позва, але пагадзіўся сустрэцца з супрацоўнікам міліцыі ў горадзе.

Падчас сустрэчы Павел Кот прапанаваў даць тлумачэнні ў сувязі з правядзеннем праверкі органаў МУС ў дачыненні Буракова па арт. 193.1 Крымінальнага кодэкса Рэспублікі Беларусь па “факце дзейнасці незарэгістраванай арганізацыі ПЦ “Вясна””. Журналіст даведаўся, што праверка ў межах Крымінальна-працэсуальнага кодэкса РБ праводзіцца Кастрычніцкім РУУС г. Магілёва з 8 кастрычніка 2018 г. Супрацоўнікі праваахоўных органаў узялі тлумачэнні ў некалькіх чалавек, з якімі Буракоў сустракаўся ў якасці журналіста mspring.online, і на падставе гэтага нібыта пацвердзілі яго датычнасць да дзейнайсці правабарончага цэнтра “Вясна”.

Лейтэнант Кот склаў пратакол апытання, аднак Аляксандр Буракоў адмовіўся яго падпісваць, бо не лічыць сябе вінаватым у нейкім парушэнні беларускага заканадаўства. Напрыканцы сустрэчы міліцыянт настойліва “параіў” Буракову спыніць сваю дзейнасць і больш не супрацоўнічаць с ПЦ “Вясна”.

Вядомы магілёўскі журналіст Аляксандр Буракоў-старэйшы ў гутарцы з карэспандэнтам службы маніторынгу ГА “БАЖ” выказаў свае меркаванне наконт пераследу калегі: 

— Аляксандр Буракоў быў афіцыйна папярэджаны пра пачатак праверкі паводле арт. 193 ч. 1 Крымінальна-працэсуальнага кодэкса. Зразумела, што гэта запалохванне. Праверка можа цягнуцца невядома колькі і скончыцца нічым альбо ўзбуджэннем крымінальнай справы. І тут вельмі важны момант: калі справу ўзбудзяць, то будзе абірацца мера стрымання. То бок у любы момант чалавека могуць закрыць у СІЗА. Гэта значыць, што кожную хвіліну чалавек мусіць жыць, нібы яго заўтра пасадзяць. І тут для нас вельмі важна адсочваць гэтую сітуацыю, — выказаў свае меркаванне Аляксандр Буракоў-старэйшы.

Арт. 193–1 Крымінальнага кодэкса Рэспублікі Беларусь прадугледжвае адказнасць у выглядзе штрафу, або арышту на тэрмін да шасці месяцаў, або пазбаўлення волі на тэрмін да двух гадоў.

Рада ПЦ “Вясна” прыняла адмысловую заяву, у якой выказала рашучы пратэст і патрабаване да ўладаў Рэспублікі Беларусь:

• Неадкладна спыніць праверку сілавых структураў у дачыненні да сябра ПЦ “Вясна” Алеся Буракова;

• прыняць захады скіраваныя на адмену забароны на дзейнасць незарэгістраваных арганізацый у Рэспубліцы Беларусь, а таксама на дэкрыміналізацыю такой дзейнасці і адмену арт. 193.1 КК РБ;

• стварыць належныя ўмовы для легітымнай дзейнасці праваабарончых арганізацый краіны і ПЦ “Вясна” ў прыватнасці, у адпаведнасці з міжнароднымі абавязальніцтвамі ў галіне правоў чалавека, добраахвотна ўзятымі Рэспублікай Беларусь.