Журналісты ў зоне баявых дзеянняў: 24 лютага БАЖ і Саюз журналістаў Літвы адкрыюць выставу, прысвечаную ўкраінскім медыйшчыкам
24 лютага на чыгуначным вакзале ў Вільні адкрыецца выстава «Украіна: журналісты ў зоне баявых дзеянняў», якая раскажа пра працу рэпарцёраў падчас паўнамаштабнага нападу Расіі на Украіну, а таксама стане данінай павагі і памяці калегам, якія аддалі свае жыцці, асвятляючы вайну.
Фатаграфіі, аб’яднаныя выставай «Украіна: журналісты ў зоне баявых дзеянняў», паказваюць працу медыйшчыкаў у розных гарадах і рэгіёнах гэтай краіны. У экспазіцыі можна будзе пабачыць 27 здымкаў, у тым ліку працы вядомых украінскіх і міжнародных фатографаў: лаўрэата Пулітцэраўскай прэміі і World Press Photo Яўгена Малалеткі, фатографа інфармацыйнага агенцтва Associated Press Яфрэма Лукацкага, вядомых украінскіх ваенных фатографаў Канстанціна і Улады Ліберавых, Яна Дабраносава, Дзмітрыя Ключка, Андрэя Андрыенкі.
Фотавыстава была падрыхтаваная восенню Нацыянальным саюзам журналістаў Украіны. Яна паспела пабываць ўжо ў Брусэлі і Парыжы пры падтрымцы Еўрапейскай федэрацыі журналістаў.
У другую гадавіну пачатку поўнамаштабнай вайны блізкія сябры ўкраінскіх журналістаў — размешчаная цяпер у Вільні Беларуская асацыяцыя журналістаў і Саюз журналістаў Літвы — ініцыююць экспазіцыю фотаздымкаў у холе віленскага чыгуначнага вакзала.
— Вайна Расіі супраць Украіны з’яўляецца міжнародным злачынствам і зверствам. Акрамя мноства загінулых вайскоўцаў ахвярамі гэтага крывавага нападу, які працягваецца, сталі тысячы мірных грамадзян, жанчын, дзяцей. Ад рук расійскіх забойцаў загінулі і дзясяткі прадстаўнікоў украінскіх і міжнародных медыя, якія працягвалі гераічна асвятляць гэту вайну.
Усе дні вайны мы паказваем нашую салідарнасць з украінскімі калегамі і аказваем ім падтрымку. У другую гадавіну поўнамаштабнага ўварвання мы хацелі б засяродзіць увагу людзей на мужнай і самаадданай працы нашых украінскіх калег, – падкрэслівае старшыня БАЖ Андрэй Бастунец.
— Сёння Украіна і яе народ з’яўляюцца для мяне сімвалам свабоды і мужнасці. Для любога чалавека, асабліва журналіста, гэта мусіць быць відавочна. І наш абавязак зараз усімі сіламі абараніць Украіну, — гаворыць старшыня Саюза журналістаў Літвы Дайнюс Радзявічус.
Адкрыццё выставы «Украіна: журналісты ў зоне баявых дзеянняў» адбудзецца 24 лютага а 12:00 у холе чыгуначнага вакзала Вільні.
Выстава будзе даступная для наведвальнікаў цягам двух тыдняў. Уваход вольны.
Беларуская асацыяцыя журналістаў і Саюз журналістаў Літвы запрашаюць калег і суайчыннікаў наведаць выставу.
Чытайце яшчэ:
У Берліне ў межах кінапрэміі «Чырвоны верас» уганаравалі фільм Мары Тамковіч «У жывым эфіры»
«Яны баяцца і разумеюць, што нас думаць па-іншаму не прымусіш». Інтэрв’ю з Вольгай Такарчук
Нармалізацыя як умова выжывання. Што цяпер асвятляюць «перафарматаваныя» выданні
![](https://baj.media/wp-content/themes/baj/assets/images/telegram-logo.jpg)