Эстафета добрых спраў будзе працягвацца і ў 2018-ым годзе

У канцы снежня 2016 года «БАЖ» запусціў Эстафету добрых спраў, якая ставіла за мэту актывізацыю дзейнасці сяброў рэгіянальных суполак, піяр добрага іміджу арганізацыі і гартаванне карпаратыўнага духу між чальцамі асацыяцыі.

За год было здзейснена каля 20 спраў у 11 гарадах Беларусі, у якіх задзейнічалі больш за 100 чалавек. Гэта былі дабрачынныя акцыі, прыборкі памятных месцаў, выдавецкая дзейнасць, літаратурныя конкурсы з прызамі, а таксама арганізацыя народных святаў. Пра ўсе праведзеныя мерапрыемствы можна прачытаць у адпаведным раздзеле «Эстафета добрых спраў».

У канцы 2017-га года на фінальнай сустрэчы лідарскага курса БАЖ удзельнікі вырашылі, што эстафета сталася цудоўнай ідэяй, якую варта працягнуць яшчэ на год. Таму ўсе разам чакаем новых добрых спраў, запрашаем калег быць больш актыўнымі, і з пазітывам глядзець у будучыню.