Фільм «Пад шэрым небам» пра Кацярыну Андрэеву з’явіўся ў інтэрнэце

Фільм «Пад шэрым небам» ужо можна паглядзець на HBO і іншых стрымінгавых пляцоўках. А ў студзені можна будзе даведацца, ці атрымае ён узнагароду на Еўрапейскай кінапрэміі.

Фрагмент постэру фільму «Пад шэрым небам». Выява: Imdb.com

Мастацкі фільм «Пад шэрым небам» рэжысёркі Мары Тамковіч з’явіўся на шэрагу анлайн-пляцовак, у тым ліку HBO Max, Canal+, Pol­sat Box і іншых. Паглядзець фільм можна па падпісках, якія пачынаюцца ад 30 злотых – каля 24 беларускіх рублёў.

З’яўленне фільму на стрымінгах доўгачаканае: прэм’ера адбылася яшчэ ў чэрвені 2024 года, але раней фільм паказвалі толькі на фестывалях і ў абмежаваным пракаце ў лічаных кінатэатрах за межамі Беларусі. Цяпер яго можна паглядзець онлайн (у Беларусі можа спатрэбіцца VPN і картка непадсанкцыйнага банку, якая спрацуе для аплаты).

Фільм «Пад шэрым небам» заснаваны на рэальных падзеях і распавядае гісторыю журналісткі «Белсату» Кацярыны Андрэевай і ейнага мужа Ігара Ільяша. Абое цяпер палітычныя зняволеныя ў Беларусі. Фільм пра іх не дакументальны, але грунтуецца на сапраўднай гісторыі, у тым ліку на размовах рэжысёркі з Ільяшом і з затрыманай разам з Кацярынай журналісткай Дар’яй Чульцовай. Фільм здымаўся на мінімальны бюджэт, на здымкі было толькі 15 дзён.

Мара Тамковіч: «Для мяне “Пад шэрым небам” — гэта не фільм пра пратэсты. Гэта фільм перадусім пра людзей, пра каханне»

«Пад шэрым небам» перамог на фестывалі «Паўночнае ззянне» ў 2024 годзе, а Мара Тамковіч атрымала прэмію за найлепшы дэбют на 49‑м Фестывалі польскіх мастацкіх фільмаў у Гдыні. Цяпер фільм намінавалі на «Еўрапейскае адкрыццё года» на Еўрапейскай кінапрэміі (так званы Еўрапейскі Оскар). Цырымонія ўзнагароджання пройдзе 17 студзеня 2026 года.